അഡ്‌ലെയ്‌ഡ്: രണ്ടാം ആഷസ് ടെസ്റ്റിന്‍റെ മൂന്നാം ദിനം തകർച്ചയിൽ നിന്ന് കരകയറി ഇംഗ്ലണ്ട്. ഓസ്ട്രേലിയയുടെ 473 എന്ന കൂറ്റൻ ലക്ഷ്യം പിന്തുടർന്നിറങ്ങിയ ഇംഗ്ലണ്ട് ഉച്ചഭക്ഷണത്തിന് പിരിയുമ്പോൾ രണ്ട് വിക്കറ്റ് നഷ്‌ടത്തിൽ 140 എന്ന നിലയിലാണ്. 68 റണ്‍സുമായി ഡേവിഡ് മലാനും, 57 റണ്‍സുമായി ജോ റൂട്ടുമാണ് ക്രീസിൽ. ഓസ്‌ട്രേലിയയെക്കാൾ 333 റണ്‍സിന് പിറകിലാണ് ഇംഗ്ലണ്ട്.
മൂന്നാം ദിനം ഒൻപത് വിക്കറ്റ് നഷ്‌ടത്തിൽ 473 റണ്‍സിന് ഡിക്ലയർ ചെയ്‌ത ഓസീസ് മറുപടി ബാറ്റിങ്ങിനിറങ്ങിയ ഇംഗ്ലണ്ടിനെ തുടക്കത്തിലേ പ്രതിരോധത്തിലാക്കിയിരുന്നു. 12 റണ്‍സെടുക്കുന്നതിനിടെ ഇംഗ്ലണ്ടിന്‍റെ ഓപ്പണർമാരായ ഹസീബ് ഹമീദും(6), റോറി ജോസഫ് ബേണ്‍സും(4) കൂടാരം കയറി. ഇതോടെ തകർച്ച മുന്നിൽ കണ്ട ഇംഗ്ലണ്ടിനായി ക്യാപ്‌റ്റൻ ജോ റൂട്ടും, ഡേവിഡ് മലാനും ചേർന്ന് ശ്രദ്ധയോടെ ബാറ്റ് വീശുകയായിരുന്നു.