സിഡ്‌നി: ആഷസ് പരമ്പരയിലെ നാലാം ടെസ്റ്റിന്‍റെ രണ്ടാം ദിനം എട്ട് വിക്കറ്റ് നഷ്ടത്തില്‍ 416 റണ്‍സെടുത്ത് ഡിക്ലയര്‍ ചെയ്‌ത ഓസീസിന് ഇംഗ്ലണ്ടിനെ ബാറ്റിങ്ങിനയച്ചു. രണ്ടാം ദിനം അവസാനിക്കുമ്പോള്‍ വിക്കറ്റ് നഷ്‌ടമില്ലാതെ 13 റണ്‍സെന്ന നിലയിലാണ് ഇംഗ്ലണ്ടുള്ളത്. ഹസീബ് ഹമീദ് (2), സാക്ക് ക്രാളി (2) എന്നിവരാണ് ക്രീസില്‍.
നേരത്തെ മൂന്ന് വിക്കറ്റ് നഷ്ടത്തില്‍ 126 റണ്‍സെന്ന നിലയിലാണ് ഓസീസ് രണ്ടാം ദിനം ഒന്നാം ഇന്നിങ്സ് ബാറ്റിങ് പുനരാരംഭിച്ചത്. ഉസ്‌മാന്‍ ഖവാജയുടെ മിന്നുന്ന സെഞ്ചുറിയും സ്‌റ്റീവ് സ്‌മിത്തിന്‍റെ അര്‍ധ സെഞ്ചുറിയുമാണ് ഓസീസിന്‍റെ ടോട്ടലില്‍ നിര്‍ണായകമായത്. 260 പന്തില്‍ 137 റണ്‍സാണ് ഖവാജ അടിച്ച് കൂട്ടിയത്. 141 പന്തില്‍ 67 റണ്‍സാണ് സ്‌മിത്തിന്‍റെ നേട്ടം.
ഡേവിഡ് വാര്‍ണര്‍ (30), മാര്‍കസ് ഹാരിസ് (38), മര്‍നസ് ലബുഷെയന്‍ (28), കാമറോണ്‍ ഗ്രീന്‍ (5), അലക്‌സ് ക്യാരി (13), പാറ്റ് കമ്മിന്‍സ് (24), എന്നിവരാണ് പുറത്തായത്. മിച്ചല്‍ സ്റ്റാര്‍ക്ക് (34), നഥാന്‍ ലിയോണ്‍ (16) എന്നിവര്‍ പുറത്താവാതെ നിന്നു.