ഹോബാർട്ട്: ആഷസ് പരമ്പരയിൽ ഓസ്ട്രേലിയക്കെതിരെ സമ്പൂർണ തോൽവി വഴങ്ങി ഇംഗ്ലണ്ട്. പരമ്പരയിലെ അഞ്ചാമത്തെയും അവസാനത്തെയും മത്സരത്തിൽ 146 റണ്‍സിനായിരുന്നു ഓസീസിന്‍റെ ജയം. ഇതോടെ പരമ്പര 4-0 ന് ഓസ്ട്രേലിയ സ്വന്തമാക്കി. പരമ്പരയിലെ നാലാമത്തെ മത്സരം സമനിലയിലായിരുന്നു. ഓസീസ് താരം ട്രാവിസ് ഹെഡാണ് കളിയിലേയും പരമ്പരയിലേയും താരം. സ്‌കോര്‍: ഓസ്ട്രേലിയ 303, 155/ ഇംഗ്ലണ്ട് 188, 124
അവസാന ടെസ്റ്റിൽ ഓസ്ട്രേലിയയുടെ 271 റണ്‍സ് വിജയ ലക്ഷ്യം പിന്തുടർന്നിറങ്ങിയ ഇംഗ്ലണ്ട് 124 റണ്‍സിന് ഓൾ ഔട്ട് ആവുകയായിരുന്നു. ഓപ്പണർമാരായ റോറി ജോസഫ് ബേണ്‍സ് (26), സാക്ക് ക്രാവ്‌ലി (36) എന്നിവർക്ക് മാത്രമാണ് ഇംഗ്ലണ്ട് നിരയിൽ അൽപ്പമെങ്കിലും പിടിച്ചുനിൽക്കാനായത്. ഓപ്പണിങ് സഖ്യം പുറത്തായതോടെ ഇംഗ്ലണ്ട് നിര ചീട്ടുകൊട്ടാരം പോലെ തകർന്നു.
രണ്ടാം ഇന്നിങ്സിൽ ഇംഗ്ലണ്ട് നിരയിൽ അഞ്ച് താരങ്ങൾക്ക് മാത്രമാണ് രണ്ടക്കം കടക്കാനായത്. മധ്യനിരയിൽ ഒരു താരത്തിന് പോലും പിടിച്ചുനിൽക്കാനാകാത്തനാണ് ഇംഗ്ലണ്ടിന് വലിയ തോൽവി നേടിക്കൊടുത്തത്. ഓസ്ട്രേലിയക്കായി പാറ്റ് കമ്മിൻസ്, സ്കോട്ട് ബോളണ്ട്, കാമറൂണ്‍ ഗ്രീൻ എന്നിവർ മൂന്ന് വിക്കറ്റ് വീതം വീഴ്‌ത്തി. മിച്ചൽ സ്റ്റാർക്കിന് ഒരു വിക്കറ്റ് ലഭിച്ചു.