സിഡ്‌നി: ആഷസ് പരമ്പരയിലെ നാലാം ടെസ്റ്റിലെ സമനിലയിലൂടെ ടീമിന്‍റെ മാനം തിരിച്ച് പിടിച്ചതായി ഇംഗ്ലണ്ട് ക്യാപ്റ്റന്‍ ജോ റൂട്ട്. മുന്‍ മത്സരങ്ങളിലെ നിരാശയ്‌ക്ക് ശേഷം ഒരു ചെറിയ മുന്നേറ്റമാണിതെന്നും റൂട്ട് അവകാശപ്പെട്ടു.
ഓസീസിനെതിരയാ നാലാം ടെസ്റ്റിന്‍റെ അഞ്ചാം ദിനം മുഴുവനും ബാറ്റ് ചെയ്‌താണ് സിഡ്‌നി ക്രിക്കറ്റ് ഗ്രൗണ്ടില്‍ ഇംഗ്ലണ്ട് നാടകീയമായ സമനില നേടിയത്. ഓസീസ് ഉയര്‍ത്തിയ 358 റണ്‍സ് വിജയ ലക്ഷ്യം പിന്തുടര്‍ന്ന ഇംഗ്ലണ്ട് അഞ്ചാം ദിന മത്സരം അവസാനിക്കുമ്പോള്‍ 9 വിക്കറ്റ് നഷ്ടത്തിൽ 270 റൺസ് എന്ന നിലയിലായിരുന്നു.
അവസാന വിക്കറ്റില്‍ പൊരുതി നിന്ന സ്റ്റുവര്‍ട്ട് ബ്രോഡും (35 പന്തില്‍ 8) ജിമ്മി ആന്‍ഡേഴ്‌സണുമാണ് (6 പന്തില്‍ 0) കളി സമനിലയിലെത്തിച്ചത്. 100 പന്തില്‍ 77 റണ്‍സെടുത്ത സാക്ക് ക്രൗളിയാണ് ഇംഗ്ലണ്ടിന്‍റെ ടോപ് സ്‌കോറര്‍.