ഹെഡിങ്‌ലി:ആഷസ് (Ashes) പരമ്പരയിലെ മൂന്നാം ടെസ്റ്റിന്‍റെ രണ്ടാം ദിനത്തില്‍ ലീഡ് പിടിക്കാന്‍ ആതിഥേയരായ ഇംഗ്ലണ്ട് (England) ഇറങ്ങും. 68-3 എന്ന നിലയിലാണ് ഇംഗ്ലീഷ് പട. നിലവില്‍ ഓസ്ട്രേലിയയുടെ (Australia) ഒന്നാം ഇന്നിങ്‌സ് സ്‌കോറിന് 195 റണ്‍സ് പിന്നിലാണ് അവര്‍.
ജോ റൂട്ട് (19), ജോണി ബെയര്‍സ്റ്റോ (1) എന്നിവരാണ് ക്രീസില്‍. ഹെഡിങ്‌ലിയില്‍ ടോസ് നേടിയ ഇംഗ്ലണ്ട് നായകന്‍ ഓസ്‌ട്രേലിയയെ ആദ്യം ബാറ്റിങ്ങിന് അയക്കുകയായിരുന്നു. തുടര്‍ന്ന് മത്സരത്തിന്‍റെ ഒന്നാം ദിനത്തില്‍ തന്നെ കങ്കാരുപ്പടയെ ഓള്‍ഔട്ടാക്കാന്‍ ഇംഗ്ലണ്ടിനായി.
60.4 ഓവറില്‍ 263 റണ്‍സിലാണ് ആതിഥേയര്‍ സന്ദര്‍ശകരെ എറിഞ്ഞൊതുക്കിയത്. 118 റണ്‍സ് നേടിയ മിച്ചല്‍ മാര്‍ഷാണ് (Mitchell Marsh) ഒന്നാം ഇന്നിങ്‌സില്‍ ഓസ്ട്രേലിയയുടെ ടോപ്‌ സ്കോറര്‍. തുടര്‍ന്ന് ആദ്യ ഇന്നിങ്‌സില്‍ ബാറ്റിങ് ആരംഭിച്ച ഇംഗ്ലണ്ടിന് ഇന്നലെ തന്നെ മൂന്ന് വിക്കറ്റുകള്‍ നഷ്‌ടപ്പെട്ടു.
സ്‌കോര്‍ 18ല്‍ നില്‍ക്കെ ഇംഗ്ലണ്ട് നിരയില്‍ നിന്നും ബെന്‍ ഡക്കറ്റിനെയാണ് ഓസ്‌ട്രേലിയ ആദ്യം കൂടാരം കയറ്റിയത്. ആറ് പന്തില്‍ രണ്ട് റണ്‍സെടുത്ത ഡക്കറ്റിനെ ഓസീസ് നായകന്‍ പാറ്റ് കമ്മിന്‍സ് (Pat Cummins) വിക്കറ്റ് കീപ്പര്‍ അലക്‌സ് കാരിയുടെ കൈകളില്‍ എത്തിക്കുകയായിരുന്നു. പിന്നാലെയെത്തിയ ഹാരി ബ്രൂക്കും (Harry Brook) അതിവേഗം മടങ്ങി.
കമ്മിന്‍സ് തന്നെയാണ് ബ്രൂക്കിന്‍റെ വിക്കറ്റും സ്വന്തമാക്കിയത്. പുറത്താകുമ്പോള്‍ 11 പന്തില്‍ 3 റണ്‍സായിരുന്നു ബ്രൂക്കിന്‍റെ സമ്പാദ്യം. ആറാം ഓവറില്‍ സ്‌കോര്‍ 22ല്‍ നില്‍ക്കെയാണ് ബ്രൂക്കിനെ ഇംഗ്ലണ്ടിന് നഷ്‌ടപ്പെട്ടത്.
മൂന്നാം വിക്കറ്റില്‍ സാക് ക്രാവ്‌ലിയും ജോ റൂട്ടും (Joe Root) ചേര്‍ന്നാണ് പിന്നീട് ഇംഗ്ലണ്ട് സ്‌കോര്‍ ഉയര്‍ത്തിയത്. ഇരുവരും ചേര്‍ന്ന് 43 റണ്‍സ് കൂട്ടിച്ചേര്‍ത്തു. 39 പന്തില്‍ 33 റണ്‍സ് നേടിയ സാക് ക്രാവ്‌ലിയെ മടക്കി മിച്ചല്‍ മാര്‍ഷാണ് ഓസീസിന് നിര്‍ണായക ബ്രേക്ക് ത്രൂ നല്‍കിയത്.