ബാഡ്മിന്റണ് കോര്‍ട്ടില്‍ പി വി സിന്ധു ആകാശത്തേക്ക് റാക്കറ്റുയര്‍ത്തി. മൂവര്‍ണക്കൊടി ഉയര്‍ന്നു. ലോക ബാഡ്‌മിന്‍റണില്‍ ഇന്ത്യയ്ക്കായി കിരീടം നേടി ഇന്ത്യയുടെ സിന്ദൂര തിലകമായി പിവി സിന്ധു മാറി. എന്നാല്‍ ഈ ജയത്തിന് വലിയ പരാജയത്തിന്‍റെ കഥ കൂടി പറയാനുണ്ട്. ഓര്‍മയില്ലേ, വീരേന്ദര്‍ സേവാഗ് പറഞ്ഞപോലെ ശ്വാസം നിലച്ചു പോയ ആ ഫൈനല്‍. 2017ല്‍ കണ്ണീരോടെ കോര്‍ട്ടില്‍ നിന്നും മടങ്ങിയ സിന്ധു. രണ്ട് വര്‍ഷങ്ങള്‍ക്കിപ്പുറം ലോക നാലാം റാങ്കുകാരി ഒക്കുഹാരയെ പരാജയപ്പെടുത്തുമ്പോള്‍ സങ്കടക്കണ്ണീര്‍ ആനന്ദക്കണ്ണീരായി മാറി.
ബാഡ്മിന്റണ് ചരിത്രത്തിലെ ഏറ്റവും ദൈര്‍ഘ്യമേറിയ മത്സരത്തിനാണ് അന്നത്തെ ലോകചാമ്പ്യന്‍ഷിപ്പ് സാക്ഷിയായത്. 110 മിനിറ്റ് നീണ്ടു നിന്ന 2017ലെ ഫൈനല്‍. വൈകിട്ട് 7.29ന് ആരംഭിച്ച മത്സരം 9.18നാണ് അവസാനിച്ചത്. ആദ്യ ഗെയിം പൂര്‍ത്തിയാകാന്‍ തന്നെ 25 മനിറ്റ് എടുത്തു. 19-21, 22-20, 20-22 എന്ന സ്കോറില്‍ പരാജയം സമ്മതിക്കുമ്പോള്‍ സിന്ധു മനസില്‍ കുറിച്ചിട്ടതാകണം ഇങ്ങനെയൊരു ജയം. കഴിഞ്ഞ വര്‍ഷം അതിന് പകരം വീട്ടുമെന്ന് കരുതിയെങ്കിലും വെള്ളി കൊണ്ട് തൃപ്തിപ്പെടേണ്ടി വന്നു. ഇക്കുറി അത് സംഭവിച്ചില്ല. ആദ്യ ഗെയിമില്‍ ആധിപത്യം ഉറപ്പിച്ച സിന്ധു നേരിട്ടുള്ള സെറ്റുകള്‍ക്ക് ജയിച്ചാണ് പകരം വീട്ടിയത്. 38 മിനിറ്റുകള്‍ക്ക് എതിരാളിയെ കീഴടക്കാന്‍ കഴിഞ്ഞു ഇന്ത്യന്‍ താരത്തിന്.