കരീബിയന്‍ ദ്വീപിലെ ജമൈക്കയിൽ നിന്നും ലോകശ്രദ്ധയിലെക്ക് ഓടിക്കയറിയ വേഗതയുടെ രാജകുമാരനാണ് ഉസൈൻ ബോൾട്ട്. ബോള്‍ട്ടിനൊപ്പം ശ്രദ്ധ നേടിയിരിക്കുകയാണ് 'കല്‍ക്കി' എന്ന മലയാള സിനിമയുടെ ബീജിയവും. ഉസൈൻ ബോൾട്ട് ട്വിറ്ററില്‍ പങ്കുവെച്ച വീഡിയോയിലാണ് കല്‍ക്കിയുടെ ബീജിയം ഉപയോഗിച്ചിരിക്കുന്നത്.
"ജീവിതം ഒരു യാത്രയാണ്. നിങ്ങളിൽ വിശ്വസിക്കൂ," എന്ന തലക്കെട്ടോടെ പങ്കുവെച്ച 57 സെക്കൻഡിലുള്ള വീഡിയോയാണ് തരംഗമാകുന്നത്. ആദ്യത്തെ പരാജയത്തിൽ നിന്നും ലോക റെക്കോർഡിലേക്ക് ഓടിയെത്തിയ ആവേശകരമായ ദൃശ്യങ്ങളാണ് വീഡിയോയിലുള്ളത്.
ജേക്സ് ബിജോയ് ആണ് ചിത്രത്തിന്‍റെ പശ്ചാത്തല സംഗീതം തയ്യാറാക്കിയത്. തന്‍റെ സംഗീതം ഉസൈൻ ബോൾട്ട് പ്രചോദനാത്മകമായ വീഡിയോയിൽ ഉപയോഗിച്ചതിലെ സന്തോഷം സംഗീത സംവിധായകൻ ജേക്സ് ബിജോയിയും പങ്കുവെച്ചു.
Out of the million pieces of music, Usain Bolt chose our Malayalam BGM to motivate the world. Honored! Credits to Jos...
Posted by Jakes Bejoy on Thursday, 21 January 2021
ദശലക്ഷക്കണക്കുള്ള ഗാനങ്ങളിൽ നിന്നും ഉസൈൻ ബോൾട്ട് നമ്മുടെ മലയാളത്തിലെ ബീജിയം തെരഞ്ഞെടുത്തതിൽ അങ്ങേയറ്റം അഭിമാനമെന്ന് ജേക്സ് ഫേസ്‌ബുക്കിൽ കുറിച്ചു. ടൊവിനോ തോമസിനെ നായകനാക്കി പ്രവീണ്‍ പ്രഭാറാം സംവിധാനം ചെയ്ത ചിത്രമാണ് കല്‍ക്കി .
