ട്രിപ്പിൾ റോളിൽ ടൊവിനോ; 'അജയന്‍റെ രണ്ടാം മോഷണം' പോസ്റ്റർ പുറത്തിറങ്ങി

കളരിക്ക് പ്രാധാന്യം നൽകി ഒരുക്കുന്ന ചിത്രത്തിൽ മൂന്ന് കാലഘട്ടങ്ങളിലുള്ള കഥാപാത്രങ്ങളായാണ് ടൊവിനോ തോമസ് എത്തുന്നത്.

ടൊവിനോ തോമസ് ട്രിപ്പിൾ റോളിലെത്തുന്ന പുതിയ ചിത്രം 'അജയന്‍റെ രണ്ടാം മോഷണ'ത്തിന്‍റെ പോസ്റ്റർ പുറത്തിറങ്ങി. മൂന്ന് കാലഘട്ടങ്ങളിലുള്ള കഥാപാത്രങ്ങളായാണ് ടൊവിനോ ചിത്രത്തിൽ എത്തുന്നത്. എന്ന് നിന്‍റെ മൊയ്‌തീൻ, കുഞ്ഞിരാമായണം, ഗോദ, കൽക്കി ചിത്രങ്ങളുടെ മുഖ്യ സഹ സംവിധായകനായിരുന്ന ജിതിൻ ലാൽ 'അജയന്‍റെ രണ്ടാം മോഷണം" സംവിധാനം ചെയ്യുന്നു. കളരിക്ക് പ്രാധാന്യം നൽകി ഒരുക്കുന്ന ചിത്രത്തിന്‍റെ തിരക്കഥ തയ്യാറാക്കിയിരിക്കുന്നത് സുജിത് നമ്പ്യാരാണ്.

അമർ അക്ബർ ആന്‍റണി, കട്ടപ്പനയിലെ ഹൃതിക്ക് റോഷൻ, ഒരു ബോംബ് കഥ തുടങ്ങിയ വമ്പൻ ഹിറ്റുകൾ നിർമ്മിച്ച യുജിഎം എന്‍റർറ്റൈൻമെന്‍റിനാണ് ചിത്രത്തിന്‍റെ നിർമാണം. 1900, 1950, 1990 എന്നീ കാലഘട്ടങ്ങളിലുടെ ചിത്രം കടന്നു പോകുന്നു. ദിബു നൈനാൻ തോമസ് ചിത്രത്തിന്‍റെ സംഗീതം ഒരുക്കിയിരിക്കുന്നു.