എറണാകുളം:മെച്ചപ്പെട്ട സാങ്കേതികവിദ്യകളില്ലാതിരുന്ന കാലഘട്ടത്തിലും പരിമിതികളെ മറികടന്ന് പുതിയ ആവിഷ്‌കരണരീതി സിനിമക്ക് പരിചയപ്പെടുത്തിയ സംവിധായകൻ, അകിര കുറൊസാവ. സിനിമാ ചരിത്രത്തിൽ പിൻതലമുറക്കാരെ ഏറ്റവുമധികം സ്വാധീനിച്ച കലാകാരനെന്ന് കുറൊസാവ അറിയപ്പെടുന്നു. ഏതൊരു സിനിമാ പ്രേമിക്കും സിനിമാ നിരീക്ഷകനും കുറൊസാവാ സിനിമകൾ ഒഴിച്ചുകൂടാൻ പറ്റാത്തവയാണ്‌. അദ്ദേഹത്തിന്‍റെ എല്ലാ സിനിമകളും ചലച്ചിത്ര സംവിധായകർക്ക് വഴികാട്ടിയാണെന്ന് നിസംശയം പറയാനാകും. ഏകദേശം 30 സിനിമകൾ കുറൊസാവാ സംവിധാനം ചെയ്തിട്ടുണ്ട്. എല്ലാം ഒന്നിനൊന്നു മെച്ചപ്പെട്ടവ തന്നെ. എന്നാൽ, 1950ൽ പുറത്തിറങ്ങിയ 'റാഷമോണ്‍' കുറൊസാവാ സിനിമകളിൽ വലിയ പ്രാധാന്യമർഹിക്കുന്നു.
ലോകസിനിമകളിൽ കുറൊസാവയിൽ നിന്നും ലഭിച്ച 'റാഷമോണ്‍ എഫക്ട്,' പുതിയ രീതിലുള്ള കഥാപറച്ചിലിനും മുഖ്യധാരാ സിനിമകളിൽ നിന്ന് വ്യത്യസ്‌തമായ ചിത്രങ്ങൾ നിർമിക്കുന്നതിനും വഴിയൊരുക്കി. ഒരു യഥാർത്ഥ സംഭവത്തിനെ നേരിൽ കണ്ടവർ പരസ്പര വിരുദ്ധമായ വ്യാഖ്യാനങ്ങൾ അവതരിപ്പിക്കുന്നതിനെയും വിവരണങ്ങൾ നൽകുന്നതിനെയുമാണ് 'റാഷമോണ്‍ എഫക്ട്' എന്ന് പറയുന്നത്. ഇത് റാഷമോണ്‍ സിനിമയിൽ വിവരിച്ച ഒരു കൊലപാതകത്തെ കണ്ട നാല് ദൃക്‌സാക്ഷികൾ, പരസ്പര വിരുദ്ധമായി സംഭവത്തെ വിവരിക്കുന്നതിൽ നിന്ന് വികസിപ്പിച്ചെടുത്തതാണ്. ഇത്തരത്തിൽ കഥയെ വിവരിക്കുന്ന ഒരുപാട് ഇന്ത്യൻ സിനിമകൾ 'റാഷമോണ്‍ എഫക്‌ടി'ലൂടെ നിർമിച്ചിട്ടുണ്ട്‌. അവയിൽ എടുത്തുപറയേണ്ടതാണ് ഏതാനും തമിഴ് ചിത്രങ്ങളും.