'96 ഫീലിങ്ങിൽ ജാനു; തെലുങ്ക് പതിപ്പിന്‍റെ ട്രെയിലർ പുറത്തിറക്കി

'96ന്‍റെ ഫീൽ ഒട്ടും കളയാതെയാണ് സാമന്ത അക്കിനേനിയും ഷര്‍വാനന്ദും മുഖ്യവേഷത്തിലെത്തുന്ന ജാനുവിന്‍റെ ട്രെയിലർ അവതരിപ്പിച്ചിരിക്കുന്നത്.

'96ലെ ജാനുവും റാമും. പ്രണയത്തെ പ്രണയിക്കാൻ തോന്നിപ്പിച്ച വിജയ് സേതുപതിയും തൃഷയും അനശ്വരമാക്കിയ കഥാപാത്രങ്ങൾ. 2018ൽ പുറത്തിറങ്ങിയ ഹിറ്റ് ചിത്രം '96ന്‍റെ സംവിധായകൻ സി.പ്രേംകുമാര്‍ തന്നെയാണ് നഷ്‌ട പ്രണയത്തിന്‍റെ ഓർമകളിലേക്ക് ഒരിക്കൽകൂടി പ്രേക്ഷകരെ ക്ഷണിക്കുന്നത്. സാമന്ത അക്കിനേനിയും ഷര്‍വാനന്ദും മുഖ്യവേഷത്തിലെത്തുന്ന ചിത്രത്തിന്‍റെ തെലുങ്ക് പതിപ്പ് 'ജാനു'വിന്‍റെ ട്രെയിലർ പുറത്തുവിട്ടു. '96ന്‍റെ ഫീൽ ഒട്ടും കളയാതെയാണ് ജാനുവിന്‍റെ ട്രെയിലർ അവതരിപ്പിച്ചിരിക്കുന്നത്. അതിനാൽ തന്നെ, റാമിനെയും ജാനുവിനെയും അവരുടെ പ്രണയത്തെയും നെഞ്ചിലേറ്റിയ ആരാധകരെ തെലുങ്ക് റീമേക്കും ഒട്ടും നിരാശരാക്കുന്നില്ല.

'96ന്‍റെ സംഗീതം ഒരുക്കിയ ഗോവിന്ദ് വസന്തയാണ് ജാനുവിന്‍റെയും ഗാനങ്ങൾക്ക് പിന്നിൽ. കൂടാതെ, തൃഷയുടെ കൗമാരകാലം അഭിനയിച്ച ഗൗരി കിഷൻ ചിത്രത്തിലും അഭിനയിച്ചിട്ടുണ്ട്. മഹേന്ദ്രന്‍ ജയരാജാണ് ഛായാഗ്രഹണം. ദിൽ രാജു, ശിരീഷ് എന്നിവര്‍ ചേര്‍ന്നാണ് ചിത്രം നിർമിക്കുന്നത്. അടുത്ത മാസം ഏഴിന് ചിത്രം തിയേറ്ററിലെത്തും.