ഒറ്റക്കൊമ്പന്‍റെ തേരോട്ടം തുടങ്ങുന്നു; സംവിധായകനും നിർമാതാവിനുമൊപ്പം സുരേഷ് ഗോപി

മാത്യൂസ് തോമസ് സംവിധാനം ചെയ്യുന്ന സുരേഷ് ഗോപി നായകനാകുന്ന ചിത്രം ഒറ്റക്കൊമ്പൻ ഷൂട്ടിങ് ആരംഭിക്കുന്നുവെന്ന് സൂപ്പർതാരം ഫേസ്‌ബുക്കിലൂടെ അറിയിച്ചു

ടോമിച്ചന്‍ മുളകുപാടത്തിന്‍റെ നിര്‍മാണത്തില്‍ ഒരുങ്ങുന്ന സുരേഷ് ഗോപി ചിത്രം ഒറ്റക്കൊമ്പൻ ചിത്രീകരണം ആരംഭിക്കുന്നു. ചിത്രത്തിനായി കഴിഞ്ഞ ദിവസം മകരദീപം തെളിഞ്ഞെന്നും എല്ലാവരുടെയും അനുഗ്രഹാശംസകളോടെ ഒറ്റക്കൊമ്പന്‍റെ തേരോട്ടം തുടങ്ങുന്നുവെന്നും നടൻ സുരേഷ് ഗോപി തന്നെയാണ് ഫേസ്‌ബുക്കിലൂടെ അറിയിച്ചത്.

• ഇന്നലെ മകരദീപം തെളിഞ്ഞു. എല്ലാവരുടെയും അനുഗ്രഹാശംസകളോടെ ഒറ്റക്കൊമ്പന്റെ തേരോട്ടം തുടങ്ങുന്നു! ⚔️ #Ottakkomban #SG250 #MathewsThomas #TomichanMulakuppadam #MulakuppadamFilms

  Posted by Suresh Gopi on Friday, 15 January 2021

സംവിധായകൻ മാത്യൂസ് തോമസിനും നിർമാതാവ് ടോമിച്ചന്‍ മുളകുപാടത്തിനുമൊപ്പമുള്ള ചിത്രം പങ്കുവെച്ചുകൊണ്ടാണ് സുരേഷ് ഗോപി ചിത്രീകരണവിശേഷം പങ്കുവെച്ചത്. 25 കോടി രൂപ ചെലവിൽ മുളകുപാടം ഫിലിംസിന്‍റെ ബാനറിലാണ് ഒറ്റക്കൊമ്പൻ നിർമിക്കുന്നത്. മുകേഷ്, വിജയരാഘവന്‍, രഞ്ജി പണിക്കര്‍, ജോണി ആന്‍റണി, സുധി കോപ്പ, കെപിഎസി ലളിത എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ഒറ്റക്കൊമ്പനിലെ പ്രതിനായകൻ ബോളിവുഡിൽ നിന്നായിരിക്കുമെന്നും സൂചനയുണ്ട്.

സുരേഷ് ഗോപിയുടെ 250ാമത്തെ ചിത്രമാണിത്. നേരത്തെ, കടുവാക്കുന്നേൽ കുറുവച്ചൻ എന്ന കഥാപാത്രത്തെ ചൊല്ലി പൃഥ്വിരാജ്- ഷാജി കൈലാസ് കൂട്ടുകെട്ടിലൊരുങ്ങുന്ന കടുവയുടെ അണിയറപ്രവർത്തകർ പകർപ്പവകാശ ലംഘനത്തിന് കേസ് നൽകിയതിനെ തുടർന്നാണ് ഒറ്റക്കൊമ്പൻ എന്ന പേരിൽ ടൈറ്റിൽ മാറ്റിയത്.