സുരേഷ് ഗോപിയുടെ കാവൽ ചിത്രത്തിന്‍റെ റിലീസ് പ്രഖ്യപിച്ചു. നിതിൻ രഞ്ജി പണിക്കർ സംവിധാനം ചെയ്യുന്ന ചിത്രം ജൂലൈ രണ്ടിന് റിലീസിനെത്തും. വരനെ ആവശ്യമുണ്ട് എന്ന ചിത്രത്തിലൂടെ നീണ്ട ഇടവേളക്ക് ശേഷം അഭിനയത്തിലേക്ക് മടങ്ങിവന്ന സുരേഷ് ഗോപിയുടെ കാവലിനായി വലിയ പ്രതീക്ഷയിലാണ് ആരാധകർ. താരത്തിന്‍റെ പിറന്നാൾ ദിനത്തിൽ പുറത്തിറങ്ങിയ ടീസറിന് ഗംഭീര പ്രതികരണമായിരുന്നു ലഭിച്ചത്. ആക്ഷൻ- ത്രില്ലറായി ഒരുക്കുന്ന മലയാള ചിത്രത്തിന്‍റെ രചന നിർവഹിക്കുന്നത് നിതിൻ രഞ്ജി പണിക്കർ തന്നെയാണ്. അഭിനേതാവും നിർമാതാവും തിരക്കഥാകൃത്തുമായ രഞ്ജി പണിക്കരുടെ മകനാണ് നിതിൻ രഞ്ജി പണിക്കർ.
ഗുഡ്‌വിൽ എന്‍റർടൈമെന്‍റ്സിന്‍റെ ബാനറിൽ ബോബി ജോർജാണ്‌ ചിത്രം നിർമിക്കുന്നത്. സുരേഷ് ഗോപി തമ്പാൻ എന്ന കഥാപാത്രമായി എത്തുന്ന കാവലിന്‍റെ ഫസ്റ്റ് ലുക്ക് പോസ്റ്റർ വിഷു ദിനത്തിൽ പുറത്തുവിടുമെന്ന് നിർമാതാവ് അറിയിച്ചു. ഒപ്പം, സിനിമയുടെ ടൈറ്റിൽ അന്വർഥമാകുന്ന തരത്തിൽ പുതിയൊരു സംരഭത്തിന് കൂടി തുടക്കം കുറിക്കുകയാണെന്ന് ജോബി ജോർജ്ജ് അറിയിച്ചു.