പവിത്രം, കണ്ണെഴുതിപൊട്ടും തൊട്ട്, വക്കാലത്ത് നാരായണന്‍ക്കുട്ടി തുടങ്ങി ഒട്ടനവധി സൂപ്പര്‍ ഹിറ്റ് ചിത്രങ്ങള്‍ ഒരുക്കിയ സംവിധായകന്‍ ടി.കെ രാജീവ് കുമാറിന്‍റെ പുതിയ സിനിമ പ്രഖ്യാപിച്ചു. യുവനടന്‍ ഷെയ്ന് നിഗമാണ് ടി.കെ രാജീവ് കുമാറിന്‍റെ ഈ ചിത്രത്തിലെ നായകന്‍. 2019ല്‍ പുറത്തിറങ്ങിയ കോളാമ്പിയായിരുന്നു ടി.കെ രാജീവ് കുമാറിന്‍റെ സംവിധാനത്തില്‍ ഏറ്റവും അവസാനം പുറത്തിറങ്ങിയ സിനിമ. നിത്യാ മേനോന്‍, രഞ്ജി പണിക്കര്‍ തുടങ്ങിയവരായിരുന്നു കോളാമ്പിയില്‍ മുഖ്യ വേഷങ്ങള്‍ കൈകാര്യം ചെയ്‌തത്. ഷെയ്ന് നിഗം തന്നെയാണ് പുതിയ സിനിമയെ കുറിച്ചുള്ള വിശേഷങ്ങള്‍ സോഷ്യല്‍മീഡിയ വഴി പങ്കുവെച്ചത്. നവാഗതനായ ശരത് മേനോന്‍ സംവിധാനം ചെയ്‌ത വെയിലാണ് ഷെയ്ന് നിഗമിന്‍റേതായി റിലീസിന് ഒരുങ്ങുന്ന മറ്റൊരു ചിത്രം. സാജിദ് യഹിയ സംവിധാനം ചെയ്യുന്ന ഖല്‍ബ് എന്ന ചിത്രമാണ് അണിയറയില്‍ ഒരുങ്ങുന്നത്. 24 ഫ്രെയിംസിന്‍റെ ബാനറില്‍ സൂരജ് സി.കെ, ബിജു സി.ജെ, ബാദുഷ എന്‍.എം എന്നിവര്‍ ചേര്‍ന്നാണ് ടി.കെ രാജീവ് കുമാര്‍-ഷെയ്ന് നിഗം ചിത്രം നിര്‍മിക്കുന്നത്. സിനിമയുടെ പേര് വെളിപ്പെടുത്തിയിട്ടില്ല. നവാഗതനായ കൃഷ്ണദാസ് പങ്കിയാണ് രചന നിര്‍വഹിക്കുന്നത്. ടി.കെ രാജീവ്കുമാര്‍ സംവിധാനം ചെയ്‌ത ചില സ്റ്റേജ് ഷോകള്‍ക്ക് കൃഷ്ണദാസ് പങ്കി തിരക്കഥ ഒരുക്കിയിട്ടുണ്ട്. വര്‍ഷങ്ങളായി മനസിലുള്ള കോമഡി ടച്ചുള്ള ഒരു കഥയുടെ ആശയം രാജീവ്കുമാര്‍ കൃഷ്ണദാസിനോട് പറയുകയും കൃഷ്ണദാസ് അത് മനോഹരമായ ഒരു തിരക്കഥയാക്കുകയുമായിരുന്നു.
-
Blessed to have gotten the opportunity to work with T.K Rajeev Kumar sir. All of your support and prayers is the reason I am still here. Hoping it would continue in the future too! ♥️
Posted by Shane Nigam on Friday, February 19, 2021
അഭിനേതാക്കളുടെ സംഘടനയായ അമ്മ നിര്‍മിക്കുന്ന ത്രില്ലര്‍ ചിത്രത്തിന്‍റെ തിരക്കഥാ രചനയിലാണ് രാജീവ് കുമാര്‍ ഇപ്പോള്‍. പ്രിയദര്‍ശനോടൊപ്പം ചേര്‍ന്ന് ഈ ചിത്രം സംവിധാനം ചെയ്യുന്നതും ടി.കെ രാജീവ്കുമാറാണ്. ഷെയ്ന് നിഗം ചിത്രത്തിന്‍റെ ഛായാഗ്രഹണം നിര്‍വഹിക്കുന്നത് സുദീപ് ഇളമണ്ണാണ്. ശ്രീകര്‍ പ്രസാദാണ് എഡിറ്റര്‍. വിനായക് ശശികുമാര്‍, ബീയാര്‍ പ്രസാദ് എന്നിവരുടെ വരികള്‍ക്ക് രമേഷ് നാരായണ്‍ സംഗീത സംവിധാനം നിര്‍വഹിക്കും.