കുടുംബപ്രേക്ഷകരുടെ പ്രിയങ്കരനായ സത്യൻ അന്തിക്കാട് ഇഖ്ബാല്‍ കുറ്റിപ്പുറത്തിന്‍റെ തിരക്കഥയിലൊരുക്കുന്ന ചിത്രത്തില്‍ ജയറാമും മീര ജാസ്മിനും മുഖ്യ വേഷങ്ങളില്‍. ഫോർ ഫ്രണ്ട്സ്, ഒന്നും മിണ്ടാതെ എന്നിവയ്ക്ക് ശേഷം ഇരുവരും ഒന്നിക്കുന്ന സിനിമയാണിത്. ഫേസ്ബുക്കിലൂടെയാണ് സത്യന്‍ അന്തിക്കാട് ചിത്രം പ്രഖ്യാപിച്ചത്. പേര് വെളിപ്പെടുത്തിയിട്ടില്ല.
ഞാൻ പ്രകാശൻ എന്ന ചിത്രത്തിലൂടെ മലയാളികൾക്ക് സുപരിചിതയായ ദേവിക സഞ്ജയ്, ശ്രീനിവാസൻ, സിദ്ദിഖ് എന്നിവരാണ് മറ്റ് അഭിനേതാക്കള്‍. എസ്. കുമാറാണ് ഛായാഗ്രാഹകൻ. ഹരിനാരായണന്‍റെ വരികൾക്ക് അമ്പിളി എന്ന ചിത്രത്തിലെ 'ആരാധികേ' എന്ന ഗാനം അനശ്വരമാക്കിയ വിഷ്ണു വിജയ്‌യാണ് ഈണം പകരുന്നത്. പ്രശാന്ത് മാധവ് കലാസംവിധാനവും സമീറ സനീഷ് വസ്ത്രാലങ്കാരവും നിർവഹിക്കും.