കമ്മാരസംഭവം ചിത്രത്തിലെ തിരക്കഥാകൃത്ത്- സംവിധായകൻ കോമ്പോ വീണ്ടുമൊന്നിക്കുന്ന തീർപ്പിന്‍റെ ചിത്രീകരണം നാളെ തുടങ്ങും. മുരളി ഗോപിയുടെ തിരക്കഥയിൽ രതീഷ് അമ്പാട്ട് സംവിധാനം ചെയ്യുന്ന മലയാളചിത്രത്തിൽ പൃഥ്വിരാജ്, ഇന്ദ്രജിത്ത്, വിജയ് ബാബു, സൈജു കുറുപ്പ് എന്നീ താരങ്ങളാണ് മുഖ്യകഥാപാത്രങ്ങളാകുന്നത്. ഇഷ തൽവാർ, ഹന്ന രജി കോശി എന്നിവരാണ് തീർപ്പിലെ നായികമാർ.
#Theerppu Pooja 😊 Rolling From Tomorrow.
Posted by Theerppu Movie on Friday, 19 February 2021
ചിത്രത്തിന്‍റെ പൂജാചടങ്ങുകൾ ഇന്ന് കഴിഞ്ഞെന്നും നാളെ മുതൽ സിനിമ ഷൂട്ടിങ്ങിലേക്ക് കടക്കുകയാണെന്നും അണിയറപ്രവർത്തകർ സമൂഹമാധ്യമങ്ങളിലൂടെ അറിയിച്ചു. എന്നാൽ, പൃഥ്വിരാജ് അടുത്ത മാസത്തിന്‍റെ തുടക്കത്തിലായിരിക്കും ചിത്രീകരണത്തിന്‍റെ ഭാഗമാവുക. "വിധിതീര്‍പ്പിലും പകതീര്‍പ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക് തീര്‍പ്പ്!" എന്ന കാപ്‌ഷനോടെയാണ് പൃഥ്വിരാജ് സിനിമ പ്രഖ്യാപിച്ചത്.
ഫ്രൈഡേ ഫിലിം ഹൗസിന്‍റെ ബാനറിൽ വിജയ് ബാബുവും മുരളി ഗോപിയും രതീഷ് അമ്പാട്ടും ചേർന്നാണ് തീർപ്പ് നിർമിക്കുന്നത്.
