51-ാമത് ദാദാ സാഹെബ് ഫാൽക്കെ അവാർഡിന് അർഹനായ സൂപ്പർസ്റ്റാർ രജനികാന്ത് പ്രധാനമന്ത്രിക്കും കേന്ദ്രസർക്കാരിനും ആരാധകർക്കും ട്വിറ്ററിലൂടെ നന്ദി അറിയിച്ചിരുന്നു. സഹപ്രവർത്തകർക്കും സുഹൃത്തുക്കൾക്കും ഒപ്പം ആരാധകർക്കും മാധ്യമങ്ങൾക്കും നന്ദി അറിയിച്ചുകൊണ്ട് ശേഷം താരം ഒരു പ്രസ്താവനയും പുറത്തിറക്കി. കൂട്ടത്തിൽ ഏറ്റവും ശ്രദ്ധേയമാകുന്നത് താരത്തിന്‍റെ ജീവിതത്തിലെ അതിപ്രധാനമായ വഴിത്തിരിവിന് കാരണമായ സുഹൃത്തിനോടുള്ള നന്ദി പ്രകടനമാണ്. "എന്നിലെ നടനെ ആദ്യമായി കണ്ടെത്തുകയും എന്നെ പ്രോത്സാഹിപ്പിക്കുകയും ചെയ്ത രാജ് ബഹാദൂറിന് നന്ദി." ബസ് കണ്ടക്‌ടറിൽ നിന്ന് സൂപ്പർതാരമായുള്ള രജനികാന്തിന്‍റെ വളർച്ചയുടെ കഥയറിയുന്നവർക്ക് രാജ് ബഹാദൂർ എന്ന പേര് തീർച്ചയായും അറിയാം.
ശിവാജി റാവു ഗെയ്‌ക്‌വാദ് എന്ന ബസ് കണ്ടക്‌ടറിലെ കലാകാരനെ തിരിച്ചറിഞ്ഞ് അദ്ദേഹത്തിന് അഭ്രപാളിയിലേക്കുള്ള വഴി തെളിയിച്ച കൂട്ടുകാരൻ. തന്‍റെ ഓരോ പുതിയ സിനിമ ഇറങ്ങുമ്പോഴും ആ ഉറ്റസുഹൃത്തിന്‍റെ അഭിപ്രായത്തിനായി തലൈവ കാത്തിരിക്കും. ഇന്നും മിക്ക വിശേഷ അവസരങ്ങളിലും രജനിയുടെ വീട്ടിലെ ആഘോഷങ്ങളിലും സുഹൃത്തിന്‍റെ സാന്നിധ്യം രജനി വിശിഷ്ടമായി കരുതുന്നു.