നടന്‍ രജിനികാന്ത് പതിവ് വൈദ്യപരിശോധനയ്ക്കായി അമേരിക്കയിലേക്ക് തിരിച്ചു. ശനിയാഴ്ച പുലര്‍ച്ചെ ചെന്നൈയില്‍ നിന്ന് ഖത്തര്‍ എയര്‍ലൈന്‍സിന്‍റെ പ്രത്യേക വിമാനത്തിലാണ് താരം പോയത്. ഭാര്യ ലതയും താരത്തിനൊപ്പമുണ്ട്.
ദോഹയിലെത്തി അവിടെ നിന്ന് മറ്റൊരു വിമാനത്തിലാണ് അമേരിക്കയിലേക്ക് പോയത്. മകള്‍ ഐശ്വര്യയും മരുമകനും നടനുമായ ധനുഷും അമേരിക്കയില്‍ അവധി ആഘോഷിക്കുകയാണ്. ജൂലൈയില്‍ താരം മടങ്ങിയെത്തുമെന്നാണ് റിപ്പോര്‍ട്ട്.
യാത്ര പതിവ് പരിശോധനയ്ക്ക്
അമേരിക്കയിലെ റോസെസ്റ്റര്‍ നഗരത്തിലെ മയോ ക്ലിനിക്കില്‍ രജിനികാന്ത് 2016ല്‍ വൃക്ക മാറ്റിവയ്ക്കല്‍ ശസ്ത്രക്രിയയ്ക്ക് വിധേയനായിരുന്നു. ശേഷം തുടര്‍ പരിശോധനയ്ക്കായി രണ്ട് വര്‍ഷം മുന്‍പേ പോകേണ്ടതായിരുന്നുവെങ്കിലും രാഷ്ട്രീയ പ്രവേശന നീക്കങ്ങളും കൊവിഡ് വ്യാപനവും മൂലം യാത്ര സാധ്യമല്ലാതാവുകയായിരുന്നു.