തൃശൂർ : കൊവിഡ് മഹാമാരിയുടെ നിബന്ധനകളാല്‍ ആളും ആരവവുമില്ലാതെ ഒഴിഞ്ഞുകിടന്നിരുന്ന കേരള സംഗീത നാടക അക്കാദമിയുടെ കെ.ടി മുഹമ്മദ് സ്‌മാരക തിയേറ്റര്‍ നീണ്ട ഇടവേളയ്ക്ക് ശേഷം വീണ്ടും കാണികളെ വരവേറ്റു. സംസ്ഥാന പ്രൊഫഷണല്‍ നാടകമത്സരത്തിന്‍റെ ഉദ്‌ഘാടനം അക്കാദമി വൈസ് ചെയര്‍മാൻ സേവ്യർ പുൽപ്പാട്ട് നിര്‍വഹിച്ചു.
അവസാനമായി 2018ലാണ് അക്കാദമിയിൽ നാടകങ്ങള്‍ അരങ്ങേറിയത്. 2019 ൽ നടക്കേണ്ട മത്സരമാണ് ഇപ്പോൾ ആരംഭിച്ചിട്ടുളളത്. നീണ്ട കാലയളവിന് ശേഷം തിയേറ്ററിൽ നാടകങ്ങൾ അരങ്ങിലെത്തുമ്പോൾ വലിയ ആഹ്ളാദത്തിലാണ് ആസ്വാദകര്‍.
പ്രൊഫഷണല്‍ നാടകമത്സരത്തിന്‍റെ ഭാഗമായി രാവിലെ കൊച്ചിന്‍ ചന്ദ്രകാന്തത്തിന്‍റെ അന്നം എന്ന നാടകം അരങ്ങേറി. 25 മുതല്‍ 29 വരെ നടക്കുന്ന പ്രൊഫഷണല്‍ നാടകമത്സരത്തില്‍ രാവിലെ പത്തിനും വൈകീട്ട് അഞ്ചിനുമായി രണ്ട് വീതം നാടകങ്ങളാണ് അരങ്ങേറുന്നത്.
കേരള സംഗീത നാടക അക്കാദമിയില്‍ വീണ്ടും നാടകക്കാലം; പ്രൊഫഷണൽ നാടക മത്സരത്തിന് തിരിതെളിഞ്ഞു