'പാസ്‌ഡ് ബൈ സെന്‍സർ' ഉദ്ഘാടന ചിത്രം; അനന്തപുരിക്ക് ഇനി ലോക സിനിമാക്കാലം
നാളെ വൈകിട്ട് ചലച്ചിത്രമേളയുടെ ഉദ്ഘാടനത്തിന് ശേഷം നിശാഗന്ധിയില്‍ ചിത്രം പ്രദര്‍ശിപ്പിക്കും.
തിരുവനന്തപുരം: 24-ാമത് രാജ്യാന്തര ചലച്ചിത്രോത്സവത്തിന്‍റെ ഉദ്ഘാടന ചിത്രമായി സെര്‍ഹത്ത് കരാസ്ലാന്‍ സംവിധാനം ചെയ്‌ത 'പാസ്സ്ഡ് ബൈ സെന്‍സര്‍' പ്രദര്‍ശിപ്പിക്കും. നാളെ വൈകിട്ട് നടക്കുന്ന ഉദ്ഘാടനച്ചടങ്ങിനു ശേഷം നിശാഗന്ധിയില്‍ ആണ് ചിത്രം പ്രദര്‍ശിപ്പിക്കുക. യൂറോപ്യന്‍ ചലച്ചിത്ര നിരൂപക സംഘടനയുടെ ഈ വര്‍ഷത്തെ മികച്ച ചിത്രത്തിനുള്ള പുരസ്‌കാരം നേടിയ ചിത്രം ടര്‍ക്കിഷുകാരനായ കരാസ്ലാന്‍റെ ആദ്യ ചിത്രം കൂടിയാണ്.
ജയില്‍ പുള്ളികളുടെ കത്തുകള്‍ സെന്‍സര്‍ ചെയ്യുന്ന ജയില്‍ ജീവനക്കാരന്‍റെ ആത്മസംഘര്‍ഷങ്ങളാണ് ഇതിന്‍റെ പ്രമേയം. ഒരു തടവുപുള്ളിക്കായി എത്തുന്ന കത്തിനുള്ളില്‍ നിന്നും ലഭിച്ച ഫോട്ടോയിലൂടെ ജയില്‍ ജീവനക്കാരന്‍ മെനഞ്ഞെടുക്കുന്ന കഥയിലൂടെയാണ് ചിത്രം പുരോഗമിക്കുന്നത്. തുര്‍ക്കിയിലെ രാഷ്ട്രീയ പശ്ചാത്തലവും ഒപ്പം അവിടത്തെ ഭരണത്തില്‍ കലാകാരന്മാര്‍ വീര്‍പ്പുമുട്ടുന്ന അവസ്ഥയും ചിത്രത്തിൽ പ്രതിപാദിക്കുന്നുണ്ട്.
ഗോള്‍ഡന്‍ ഓറഞ്ച്, അങ്കാറ ഫിലിം ഫെസ്റ്റിവലുകളില്‍ പ്രേക്ഷകപ്രശംസ നേടിയ ചിത്രത്തിന്‍റെ ഇന്ത്യയിലെ ആദ്യ പ്രദര്‍ശനം കൂടിയാണിത്.