നിവിന്‍ പോളിയെ കേന്ദ്രകഥാപാത്രമാക്കി രതീഷ് ബാലകൃഷ്‌ണ പൊതുവാൾ സംവിധാനം ചെയ്യുന്ന ചിത്രമാണ് കനകം കാമിനി കലഹം. ഫാമിലി എന്‍റര്‍ടെയ്‌നറായി ഒരുങ്ങുന്ന ചിത്രത്തിലെ ടീസര്‍ അടുത്തിടെയാണ് പുറത്തിറങ്ങിയത്. ഏവരെയും പൊട്ടിച്ചിരിപ്പിക്കുന്ന ടീസര്‍ ആരാധകര്‍ ഇരുകരങ്ങളും നീട്ടി സ്വീകരിച്ചിരുന്നു.
ഇപ്പോഴിതാ ചിത്രത്തിലെ പുതിയ സ്വീക്വന്‍സും അണിയറ പ്രവര്‍ത്തകര്‍ പുറത്തുവിട്ടിരിക്കുകയാണ്. നിവിന്‍ പോളി തന്‍റെ ഔദ്യോഗിക ഫേസ്ബുക്ക് പേജിലൂടെയാണ് സ്വീക്വന്‍സ് പുറത്തുവിട്ടത്. ഇതോടൊപ്പം ചിത്രത്തിന്‍റെ റിലീസ് വിവരങ്ങളും താരം ആരാധകരുമായി പങ്കുവെച്ചിട്ടുണ്ട്.
നവംബര്‍ 12ന് ഡിസ്‌നി പ്ലസ് ഹോട്ട്‌സ്‌റ്റാറിലൂടെ ചിത്രം പ്രേക്ഷകര്‍ക്ക് മുമ്പിലെത്തും. ഡിസ്‌നി പ്ലസ് ഹോട്ട്‌സ്‌റ്റാറിലൂടെ റിലീസ് ചെയ്യുന്ന മലയാളത്തിലെ ആദ്യ ചിത്രം കൂടിയാണിത്. വേള്‍ഡ് ഡിസ്‌നി ഡേ ആയ നവംബര്‍ 12നാണ് ചിത്രത്തിന്‍റെ റിലീസ് എന്നതും ശ്രദ്ധേയമാണ്.