മലയാളം കാത്തിരിക്കുന്ന ബേസിൽ ജോസഫ് ചിത്രം മിന്നൽ മുരളിയുടെ ഡിജിറ്റൽ പ്രീമിയർ അവകാശം നെറ്റ്‌ഫ്ലിക്‌സ് സ്വന്തമാക്കിയിരുന്നു. ടൊവിനോ തോമസ് നായകനാകുന്ന ചിത്രം മലയാളത്തിൽ മാത്രമല്ല, തമിഴ്, തെലുങ്ക്, കന്നഡ, ഹിന്ദി തുടങ്ങിയ ഭാഷകളിലുമാണ് റിലീസിനെത്തുന്നത്.
എന്നാൽ, സിനിമ തിയേറ്ററുകളിലൂടെ തന്നെ പുറത്തിറങ്ങുമെന്നായിരുന്നു അണിയറപ്രവർത്തകർ അറിയിച്ചത്. തിയേറ്ററുകൾ തുറക്കുന്നത് പ്രതിസന്ധിയിൽ തുടരുന്ന പശ്ചാത്തലത്തിൽ മിന്നൽ മുരളി ഒടിടി റിലീസായി എത്തുമെന്നാണ് ഏറ്റവും പുതിയ റിപ്പോർട്ട്. ചിത്രത്തിന്‍റെ റിലീസ് തിയതി തിങ്കളാഴ്‌ച പുറത്തുവിടുമെന്നും സൂചനയുണ്ട്.
നെറ്റ്‌ഫ്ലിക്‌സ് ഇന്ത്യയുടെ പുതിയ ട്വീറ്റാണ് മിന്നൽ മുരളിയുടെ റിലീസിനെ പറ്റിയുള്ള പ്രചാരണങ്ങൾക്ക് ആധാരം. 'ഇന്നത്തെ ദിവസം എളുപ്പത്തില്‍ പോകുമെന്ന് ഞങ്ങള്‍ പ്രതീക്ഷിക്കുന്നു. കാരണം നാളെ ഇതിലും എളുപ്പത്തില്‍ കടന്നുപോകും' എന്ന് കുറിച്ചുകൊണ്ട് മിന്നലിനെ സൂചിപ്പിക്കുന്ന ഇമോജിയും നെറ്റ്‌ഫ്ലിക്‌സ് ട്വീറ്റിൽ ചേർത്തിട്ടുണ്ട്.