പാ രഞ്ജിത്തിന്‍റെ സാർപട്ടാ പരമ്പരൈ എന്ന ചിത്രത്തെ അഭിനന്ദിച്ച് പ്രശസ്‌ത സംവിധായകൻ നീരജ് ഗായ്‌വാൻ. തമിഴ് ചിത്രം സാർപട്ടാ പരമ്പരൈ ഇന്ത്യയിലെ മികച്ച ബോക്‌സിങ് സിനിമയാണെന്നും, പാ രഞ്ജിത്തിന്‍റെ വിസ്‌മയകരമായ ദൃശ്യങ്ങൾക്കും സമർപ്പണത്തിനും അഭിനന്ദനങ്ങൾ അറിയിക്കുന്നുവെന്നും ദേശീയ അവാർഡ് ജേതാവ് നീരജ് ഗായ്‌വാൻ പറഞ്ഞു.
മികച്ച പിരിയഡ് ചിത്രമൊരുക്കിയ പ്രൊഡക്ഷൻ ഡിസൈനർ ടി. രാമലിംഗത്തെയും കോസ്റ്റ്യൂം ഡിസൈനർ ഈഗൻ ഏകാമ്പരത്തിനെയും പ്രത്യേകം പരാമർശിക്കുന്നുവെന്നും സംവിധായകൻ ട്വീറ്റിൽ കുറിച്ചു.
മസാൻ, ജ്യൂസ് തുടങ്ങി നിരവധി ചിത്രങ്ങളിലൂടെ പ്രശസ്‌തനായ സംവിധായകനാണ് നീരജ് ഗായ്‌വാൻ. നീരജ് ഗായ്‌വാനെ കൂടാതെ നടൻ സൂര്യയും സാർപട്ടാ പരമ്പരൈയെ വാഴ്‌ത്തി.