പൗരത്വ പ്രക്ഷോഭവും സമകാലിക പ്രശ്‌നങ്ങളും; പുതിയ ഗാനവുമായി ബിജിബാല്‍

ഇന്നത്തെ ഇന്ത്യൻ സമൂഹം നേരിടുന്ന മുഖ്യ വെല്ലുവിളികളായ തൊഴിലില്ലായ്‌മ, അഭയാർത്തികളുടെ പ്രശ്‌നങ്ങൾ, പൊലീസ് അക്രമങ്ങൾ, കര്‍ഷക ആത്മഹത്യ, നോട്ട് നിരോധനം, കശ്‌മീരിലെ നിരോധനാജ്ഞ എന്നിവയും പാട്ടിൽ പ്രതിപാദിക്കുന്നുണ്ട്.

"ചീനാറിൻ തോട്ടം മുഴുവൻ ചോര മണക്കുന്നേ.." അറബിക്കഥ, കേരളാ കഫേ, സാൽട്ട് ആന്‍റ് പെപ്പർ, പാലേരിമാണിക്യം ഒരു പാതിരാക്കൊലപാതകത്തിന്‍റെ കഥ തുടങ്ങിയ ചിത്രങ്ങളിലൂടെ മലയാളികൾക്ക് സുപരിചിതനായ പിന്നണി ഗായകനും സംഗീത സംവിധായകനുമായ ബിജിബാലിന്‍റെ പുതിയ ഗാനമാണിത്. പൗരത്വ ഭേദഗതി നിയമത്തെ വിമർശിക്കുകയാണ് ബിജിബാൽ ഈ പുതിയ ഗാനത്തിലൂടെ. ബികെ ഹരിനാരായണന്‍റെ രചനയിൽ പിറന്ന ഗാനം ആലപിച്ചിരിക്കുന്നത് ബിജിബാൽ തന്നെയാണ്. ഇന്നത്തെ ഇന്ത്യൻ സമൂഹം നേരിടുന്ന മുഖ്യ വെല്ലുവിളികളായ തൊഴിലില്ലായ്‌മയും അഭയാർഥികളുടെ പ്രശ്‌നങ്ങളും പൊലീസിന്‍റെ അക്രമവും കര്‍ഷക ആത്മഹത്യയും നോട്ട് നിരോധനവും കശ്‌മീരിലെ നിരോധനാജ്ഞയും പാട്ടിൽ പ്രമേയമാകുന്നു.

"ചില ചിലതാം പേരുകൾ മാച്ചൊരു രേഖ ചമക്കുന്നേ, അറിവിടവും കുഞ്ഞു മനസ്സും ചുട്ടുകരിക്കുന്നേ...അഭയമിരന്നെത്തിയവന്നായി തടവറ തീർക്കുന്നേ, എതിരൊളിതൻ നെറുകിൽ ഭീഷണി ലാത്തിയടിക്കുന്നേ..." ദേശീയ പൗരത്വ രജിസ്റ്ററിനും പൗരത്വ നിയമത്തിൽ വന്ന ഭേദഗതിക്കും എതിരെ പ്രതികരിച്ച വിദ്യർഥികളുടെ സംഭവങ്ങൾ ഉൾപ്പെടുത്തിയാണ് ഗാനത്തിൽ സമകാലിക ഇന്ത്യയുടെ അവസ്ഥ വിളിച്ചോതുന്ന വരികളും ദൃശ്യങ്ങളും ഒരുക്കിയിരിക്കുന്നത്. ജിബിന്‍ ഗോപാല്‍ കീബോര്‍ഡും റസല്‍ പരീദ് ഗാനത്തിന്‍റെ ലിറിക്കല്‍ വീഡിയോയും തയ്യാറാക്കിയിരിക്കുന്നു. #സെനോടുസിഎഎ എന്ന ഹാഷ്‌ ടാഗിൽ ബിജിബാൽ ഫേസ്ബുക്കിൽ പങ്കുവെച്ച ഗാനത്തിന് വമ്പിച്ച പ്രതികരണമാണ് ലഭിക്കുന്നത്.