കണ്ണൂര്‍:ഇന്നത്തെ മാഹിയെക്കുറിച്ച് എഴുതാൻ ഭയമാണെന്ന് മയ്യഴിയുടെ കഥാകാരൻ എം.മുകുന്ദൻ. ആർ.പി ഫിലിംസിന്‍റെ ബാനറിൽ നിർമ്മിക്കുന്ന മാഹി സിനിമയുടെ പൂജ തലശ്ശേരി പാർക്കോ റസിഡൻസിയിൽ ഉദ്ഘാടനം ചെയ്ത് സംസാരിക്കുകയായിരുന്നു മുകുന്ദൻ. മാഹി ഇന്നൊരു ദുരന്ത നഗരമാണെന്നും പഴയ മയ്യഴിയെന്നത് സ്വപ്ന നഗരമായിരുന്നെന്നും ഇന്നത്തെ മയ്യഴിയെക്കുറിച്ച് ഓർക്കാൻ പോലും ഭയമാണെന്നും എം.മുകുന്ദന്‍ പറഞ്ഞു. മനുഷ്യർ മാഹിയിലെത്തി മരിച്ചുവീഴുകയാണ്. മൂന്ന് ദിവസത്തിനിടെ രണ്ട് പേരാണ് വഴിയോരത്ത് മരിച്ചത്. മദ്യത്തിൽ മുങ്ങിയ മാഹിയെക്കുറിച്ച് എന്തെഴുതാനാണ്. മാഹിയെക്കുറിച്ചുള്ള നല്ല കാര്യങ്ങളെല്ലാം നേരത്തെ എഴുതിക്കഴിഞ്ഞതാണെന്നും ഇനി ഒന്നും എഴുതാനില്ലെന്നും എം.മുകുന്ദൻ പറഞ്ഞു.
മാഹി ദുരന്ത നഗരമായി: എം മുകുന്ദൻ