മലയാളത്തിലെ ഏറ്റവും വലിയ മുതല്‍ മുടക്കില്‍ ഒരുങ്ങിയ സിനിമയും മികച്ച സിനിമക്കുള്ള ദേശീയ പുരസ്‌കാരവും നേടിയ മരക്കാര്‍ അറബിക്കടലിന്‍റെ സിംഹം ഈ വര്‍ഷത്തെ ഓണം റിലീസായി ഓഗസ്റ്റ് 12ന് തിയേറ്ററുകളിലെത്തും. നടന്‍ മോഹന്‍ലാലും ചിത്രത്തിന്‍റെ നിര്‍മാതാവ് ആന്‍റണി പെരുമ്പാവൂരുമാണ് ചിത്രത്തിന്‍റെ പുതുക്കിയ റിലീസ് തിയ്യതി പുറത്തുവിട്ടത്.
2020ല്‍ തിയേറ്ററുകളില്‍ എത്തേണ്ടിയിരുന്ന സിനിമയായിരുന്നു പ്രിയദര്‍ശന്‍ സംവിധാനം ചെയ്‌ത മരക്കാര്‍ അറബിക്കടലിന്‍റെ സിംഹം. കൊവിഡും ലോക്ക്‌ ഡൗണുമാണ് റിലീസ് പലതവണ മാറ്റിവെക്കാന്‍ കാരണമായത്.
മോഹന്‍ലാലിന്‍റെ വാക്കുകള്‍
'സ്നേഹത്തോടെ... നിറഞ്ഞ മനസോടെ പ്രതീക്ഷിക്കുകയാണ്... ഈ വരുന്ന ഓഗസ്റ്റ് 12ന് ഓണം റിലീസായി മരക്കാര്‍ അറബിക്കടലിന്‍റെ സിംഹം നിങ്ങളുടെ മുന്നിലെത്തിക്കാന്‍ ഞങ്ങള്‍ക്ക് കഴിയുമെന്ന്. അതിന് നിങ്ങളുടെ പ്രാര്‍ഥനയും പിന്തുണയും ഉണ്ടാകുമെന്ന വിശ്വാസത്തോടെ ഞങ്ങള്‍ മുന്നോട്ട് നീങ്ങുന്നു. സിനിമയുടെ പുത്തന്‍ പോസ്റ്ററും റിലീസ് തിയ്യതിയും പങ്കുവെച്ച് മോഹന്‍ലാലും ആന്‍റണി പെരുമ്പാവൂരും കുറിച്ചു.