ഒരു വർഷത്തിന് ശേഷം വീണ്ടും കാമറക്ക് മുൻപിലെത്തുന്നതിന്‍റെ സന്തോഷം പങ്കുവെക്കുകയാണ് മലയാളികളുടെ പ്രിയപ്പെട്ട നടൻ മനോജ് കെ. ജയൻ. ദുല്‍ഖര്‍ സല്‍മാൻ നായകനാകുന്ന റോഷന്‍ ആന്‍ഡ്രൂസ് ചിത്രത്തിലാണ് മനോജ് കെ. ജയൻ അഭിനയിക്കുന്നത്. കൊവിഡ് കാലത്തിന് ശേഷം താൻ ആദ്യമായി അഭിനയിക്കുന്ന ചിത്രവുമിതാണെന്ന് ഫേസ്‌ബുക്കിൽ പങ്കുവെച്ച കുറിപ്പിൽ നടൻ പറഞ്ഞു.
"നമസ്കാരം കൊറോണക്കാലം സമ്മാനിച്ച ഈ വേഷവും രൂപവും ഇന്ന് ഇവിടെ അഴിച്ചു വയ്ക്കുന്നു. പകരം.... ഒരു വർഷത്തെ കാത്തിരിപ്പിനു ശേഷം ഇന്ന് വീണ്ടും കാമറയുടെ മുന്നിലേക്ക് പുതിയ രൂപത്തിൽ, പുതിയ ഭാവത്തിൽ തന്‍റെ ഓരോ സിനിമയിലൂടെയും, സംവിധാനത്തിന്‍റെ വൈദഗ്ധ്യം എന്തെന്ന് കാണിക്കുന്ന സമർഥനായ റോഷൻ ആൻഡ്രൂസിന്‍റെ സിനിമയിൽ, താര രാജകുമാരൻ ദുൽഖർ സൽമാൻ നിർമിച്ചു നായകനാവുന്ന സിനിമ. നവ മലയാള സിനിമയ്ക്ക് തിരക്കഥയുടെ കെട്ടുറപ്പെന്തെന്ന് മനസ്സിലാക്കികൊടുത്തുകൊണ്ടേയിരിക്കുന്ന…മികച്ച തിരക്കഥാകൃത്തുക്കളായ ബോബി സഞ്ജയുടെ തിരക്കഥ. കൂടെ…എന്നെ എന്നും പിന്തുണയ്ക്കുന്ന നിങ്ങളുടെ പ്രാർത്ഥനയും, സ്നേഹവും ഉണ്ടാവുമെന്ന വിശ്വാസത്തിൽ…തുടങ്ങുന്നു," എന്ന് മനോജ് കെ. ജയൻ കുറിച്ചു. അതേ സമയം, ബിഗ് ബിയുടെ രണ്ടാം ഭാഗത്തിൽ മനോജ് കെ. ജയന്‍റെ ഗംഭീര പ്രകടനത്തിനായി പ്രേക്ഷകരും ആകാംക്ഷയിലാണ്.
ദുൽഖർ സൽമാൻ നായകനാകുന്ന ചിത്രത്തിന്‍റെ തിരക്കഥ തയ്യാറാക്കുന്നത് ബോബി- സഞ്‌ജയ് ടീമാണ്. ബോളിവുഡ് നടി ഡയാന പെന്‍റിയാണ് ചിത്രത്തിലെ നായിക. സിനിമയുടെ ചിത്രീകരണം ആരംഭിച്ചു.
