Agent first look : മെഗാസ്‌റ്റാര്‍ മമ്മൂട്ടിയുടെ വരാനിരിക്കുന്ന തെലുങ്ക്‌ ചിത്രം 'ഏജന്‍റി'ന്‍റെ ഫസ്‌റ്റ്‌ ലുക്ക്‌ പോസ്‌റ്റര്‍ പുറത്ത്. 'പിശാച്‌ : ദയ ഇല്ലാത്ത രക്ഷകന്‍' എന്ന ടാഗ്‌ലൈനോട് കൂടിയാണ് പോസ്‌റ്റര്‍ അണിയറപ്രവര്‍ത്തകര്‍ പുറത്തുവിട്ടത്‌. കൈയില്‍ തോക്കുമായി തൊപ്പി വച്ച ഗെറ്റപ്പിലാണ് ഫസ്‌റ്റ്‌ ലുക്കില്‍ മമ്മൂട്ടി പ്രത്യക്ഷപ്പെടുന്നത്‌.
Surender Reddy shares agent first look: 'അച്ചടക്കത്തിലൂടെയും അര്‍പ്പണബോധത്തിലൂടെയും സ്വന്തം വഴി തുറന്ന ഇന്ത്യന്‍ സിനിമയുടെ അമരക്കാരന്‍. മെഗാസ്‌റ്റാര്‍ മമ്മൂക്ക 'ഏജന്‍റി'ന്‍റെ ചിത്രീകരണത്തില്‍ ജോയിന്‍ ചെയ്‌തു. സെറ്റിലെ മാജിക്കിന് സാക്ഷ്യം വഹിക്കാന്‍ കാത്തിരിക്കാനാവില്ല'. - 'ഏജന്‍റ്‌ ' ഫസ്‌റ്റ്‌ ലുക്ക്‌ പങ്കുവച്ച്‌ സംവിധായകന്‍ സുരേന്ദര്‍ റെഡ്ഡി കുറിച്ചു.
Agent shooting restart: നീണ്ട ഇടവേളയ്‌ക്ക്‌ ശേഷമാണ് 'ഏജന്‍റി'ന്‍റെ ചിത്രീകരണം പുനരാരംഭിച്ചിരിക്കുന്നത്‌. കഴിഞ്ഞ ഒക്‌ടോബറില്‍ ഹംഗറിയിലെ ഒരു ഷെഡ്യൂളില്‍ മമ്മൂട്ടി എത്തിയിരുന്നു. താരത്തിന്‍റെ ഹംഗറിയില്‍ നിന്നുള്ള ചിത്രങ്ങള്‍ സോഷ്യല്‍ മീഡിയയില്‍ ശ്രദ്ധ നേടുകയും ചെയ്‌തു. ആക്ഷന്‍ രംഗങ്ങള്‍ക്ക്‌ ഏറെ പ്രാധാന്യമുള്ള സിനിമയുടെ ആദ്യഘട്ട ചിത്രീകരണം ഹൈദരാബാദിലാണ് നടന്നത്. കാശ്‌മീര്‍, ഡല്‍ഹി, ഹൈദരാബാദ്‌ എന്നിവിടങ്ങളിലായാണ് ചിത്രീകരണം.
Akhil Akkineni in Agent: സ്‌പൈ ത്രില്ലര്‍ വിഭാഗത്തില്‍ ഒരുങ്ങുന്ന ചിത്രത്തില്‍ ഒരു പട്ടാള ഉദ്യോഗസ്ഥന്‍റെ വേഷമാണ് മമ്മൂട്ടിക്ക്‌. നായക പ്രാധാന്യമുള്ള കഥാപാത്രമാണിത്. തെലുങ്ക്‌ സൂപ്പര്‍താരം നാഗാര്‍ജുനയുടെ മകന്‍ അഖില്‍ അക്കിനേനിയാണ് ഏജന്‍റില്‍ നായകനായെത്തുന്നത്‌. അഖില്‍ അക്കിനേനിയുടെ മെന്‍ററുടെ റോളിലാണ് 'ഏജന്‍റി'ല്‍ മമ്മൂട്ടി പ്രത്യക്ഷപ്പെടുന്നതെന്നാണ് സൂചന. ചിത്രത്തിനായി റെക്കോര്‍ഡ്‌ പ്രതിഫലമാണ് മമ്മൂട്ടി വാങ്ങുന്നതെന്നും വിവരമുണ്ട്.
Also Read: സംവിധായകന്‍ പ്രിയദര്‍ശന്‌ ഡോക്‌ടറേറ്റ്‌
Agent cast and crew: പുതുമുഖം സാക്ഷി വൈദ്യ ആണ് നായികയായെത്തുന്നത്‌. ഹോളിവുഡ്‌ ആക്ഷന്‍ ത്രില്ലര്‍ ബോണ്‍ സീരിസില്‍ നിന്നും പ്രചോദനം ഉള്‍ക്കൊണ്ട്‌ ഒരുക്കുന്ന ചിത്രമാണിതെന്നും സൂചനയുണ്ട്‌. നിരവധി സൂപ്പര്‍ ഹിറ്റുകള്‍ സമ്മാനിച്ച സംവിധായകനാണ് സുരേന്ദര്‍ റെഡ്ഡി. വക്കാന്തം വംശി ആണ് രചന. രാകുല്‍ ഹെരിയന്‍ ആണ് ഛായാഗ്രഹണം. നവീന്‍ നൂലി എഡിറ്റിങ്ങും നിര്‍വഹിക്കും. ഹിപ്‌ഹോപ്‌ തമിഴയാണ് സംഗീതം. എ.കെ എന്‍റര്‍ടെയ്‌ന്‍മെന്‍റ്‌സ്‌, സുരേന്ദര്‍ 2 സിനിമ എന്നീ ബാനറുകളില്‍ രാമബ്രഹ്‌മണ്‍ ശങ്കര, പതി ദീപ റെഡ്ഡി എന്നിവര്‍ ചേര്‍ന്നാണ് നിര്‍മാണം.
Mammootty Telugu movies: ആന്ധ്രപ്രദേശ്‌ മുന്‍ മുഖ്യമന്ത്രി വൈ.എസ്‌. രാജശേഖര റെഡ്ഡിയുടെ ജീവിത കഥ പറഞ്ഞ 'യാത്ര'യിലാണ് (2019) മമ്മൂട്ടി ഏറ്റവും ഒടുവില്‍ തെലുങ്കിലെത്തിയത്‌.
