വലിയ ഇടവേളയ്ക്ക് ശേഷം അരവിന്ദ് സ്വാമി മലയാളത്തിലേക്ക് തിരിച്ചെത്തുന്നു എന്ന തരത്തിൽ ഏറെ ശ്രദ്ധ നേടിയ ചിത്രമാണ് 'ഒറ്റ്'. 1996ൽ പുറത്തിറങ്ങിയ 'ദേവരാഗം' എന്ന സിനിമയ്ക്ക് ശേഷം 25 വര്‍ഷങ്ങള്‍ കഴിഞ്ഞാണ് മലയാള സിനിമയില്‍ അരവിന്ദ് സ്വാമി വീണ്ടും അഭിനയിക്കുന്നത്.
അരവിന്ദ് സ്വാമിക്ക് പുറമെ കുഞ്ചാക്കോ ബോബനും ചിത്രത്തില്‍ കേന്ദ്രകഥാപാത്രമാകുന്നുണ്ട്. കഴിഞ്ഞ ദിവസം അരവിന്ദ് സ്വാമിയുടെ അമ്പത്തിയൊന്നാം പിറന്നാളായിരുന്നു. അതിനാല്‍ ഒറ്റ് ടീം അരവിന്ദ് സ്വാമി പിറന്നാള്‍ സ്പെഷ്യലായി ഒറ്റിന്‍റെ പുത്തന്‍ പോസ്റ്ററും പുറത്തുവിട്ടിരുന്നു.
കുഞ്ചാക്കോ ബോബനാണ് താരത്തിന് പിറന്നാള്‍ ആശംസിച്ച് പോസ്റ്റര്‍ സോഷ്യല്‍മീഡിയയില്‍ പങ്കുവെച്ചത്. ഒറ്റ് ഒരേ സമയം തമിഴിലും മലയാളത്തിലും റിലീസ് ചെയ്യും. മലയാളത്തില്‍ സിനിമയ്ക്ക് ഒറ്റെന്നും തമിഴില്‍ രണ്ടകമെന്നുമാണ് പേര് നല്‍കിയിരിക്കുന്നത്.
കുഞ്ചാക്കോ ബോബന്‍ അരവിന്ദ് സ്വാമിയെ കുറിച്ച് എഴുതിയത്
'ആകര്‍ഷകമായ വ്യക്തിത്വത്തിന് ഉടമയും കൂളുമായ അരവിന്ദ് സ്വാമി സാറിന് വളരെ സന്തോഷവും സുരക്ഷിതവുമായ ജന്മദിനം നേരുന്നു. സ്‌ക്രീൻ സ്‌പേസ് നിങ്ങളുമായി പങ്കിടുന്നത് ഒരു അംഗീകാരമാണ്. നമ്മുടെ സിനിമയുടെ ഷൂട്ട് പുനരാരംഭിക്കുന്നതിൽ ഞാൻ വളരെ ആവേശത്തിലാണ്.
ഒരു സഹനടന്‍ എന്നതിനേക്കാള്‍ നിങ്ങൾ എനിക്ക് ഒരു സുഹൃത്തും സഹോദരനും ഉപദേഷ്ടാവുമാണ്. ഒറ്റും രണ്ടകവും പ്രേക്ഷകരെ രസിപ്പിക്കുമെന്ന് ഞാൻ പ്രത്യാശിക്കുന്നു. നിങ്ങളിൽ നിന്നുമുള്ള നിരവധി മികച്ച സിനിമകൾക്കായി.ദൈവം അനുഗ്രഹിക്കട്ടെ എന്ന് ആശംസിക്കുന്നു....' ഒറ്റിന്‍റെ പുത്തന്‍ പോസ്റ്ററുകള്‍ പങ്കുവെച്ച് അരവിന്ദ് സ്വാമിക്കായി കുഞ്ചോക്കോ ബോബന്‍ കുറിച്ചു.