കുമ്പളങ്ങി നൈറ്റ്സില്‍ ബേബി മോളുടെ അമ്മയുടെ വേഷം ചെയ്‌ത് ശ്രദ്ധ നേടിയ നടിയും സഹസംവിധായികയുമാണ് അംബികാ റാവു. ഇപ്പോള്‍ കിഡ്‌നി സംബന്ധമായ അസുഖങ്ങളാലും മറ്റും ചികിത്സയില്‍ കഴിയുകയാണ് അംബികാ റാവു. ചികിത്സയ്‌ക്ക് ആവശ്യമായ പണം കണ്ടെത്താനാകാതെ വിഷമിക്കുന്ന താരത്തിന് സഹായവുമായി എത്തിയിരിക്കുകയാണ് നടന്‍ ജോജു ജോര്‍ജ്.
താരത്തിന്‍റെ അവസ്ഥ ഇപ്പോള്‍ വളരെ മോശമാണെന്നും പണം ഇല്ലാത്തതിനാല്‍ ചികിത്സ പ്രതിസന്ധിയിലാണെന്നും കാണിച്ചുകൊണ്ട് നടിയുമായി അടുപ്പമുള്ളവര്‍ രംഗത്ത് വന്നിരുന്നു. വാര്‍ത്ത ശ്രദ്ധയില്‍പ്പെട്ടതോടെയാണ് ജോജുവിന്‍റെ ധനസഹായം എത്തിയത്. അടിയന്തര സഹായമായി ഒരു ലക്ഷം രൂപയാണ് ജോജു അംബികക്ക് നല്‍കിയത്. ജോജു ധനസഹായം നല്‍കാമെന്ന് ഉറപ്പ് നല്‍കിയ വിവരം സംവിധായകന്‍ സാജിദ് യാഹിയയാണ് അറിയിച്ചത്.