പനാജി: ഇന്ത്യൻ ക്രിക്കറ്റ് താരം ജസ്പ്രീത് ബുംറ വിവാഹിതനായി. മോഡലും സ്‌പോര്‍ട്‌സ് അവതാരകയുമായ സഞ്ജന ഗണേശനാണ് വധു. ഗോവയിലെ ഒരു സ്വകാര്യ ഹോട്ടലില്‍ വെച്ചായിരുന്നു വിവാഹം. തന്‍റെ വിവാഹം കഴിഞ്ഞുവെന്ന വാർത്ത വിവാഹചിത്രങ്ങൾക്കൊപ്പം ബുംറ തന്നെയാണ് ട്വിറ്ററിലൂടെ അറിയിച്ചത്.
"സ്നേഹം, അത് നിങ്ങളെ യോഗ്യനെന്ന് കണ്ടെത്തുകയാണെങ്കിൽ, നിങ്ങളുടെ ഗതിയെയും അത് നയിക്കുന്നു. സ്നേഹത്താൽ നയിക്കപ്പെട്ട് ഞങ്ങൾ ഒരുമിച്ച് പുതിയ യാത്ര ആരംഭിക്കുകയാണ്. ഇന്ന് ഞങ്ങളുടെ ജീവിതത്തിലെ ഏറ്റവും സന്തോഷകരമായ ദിവസങ്ങളിലൊന്നാണ്, ഞങ്ങളുടെ സന്തോഷവും വിവാഹ വാർത്തയും നിങ്ങളുമായി പങ്കിടാൻ കഴിഞ്ഞതിൽ സന്തോഷിക്കുന്നു," എന്നാണ് ജസ്പ്രീത് ബുംറ ട്വിറ്ററിൽ കുറിച്ചത്.