റിലീസ് വീണ്ടും നീട്ടി; 'നോ ടൈം ടു ഡൈ' എത്തുക ഒക്ടോബറില്‍

സിനിമ ഒക്ടോബര്‍ എട്ടിന് റിലീസ് ചെയ്യുമെന്നാണ് അണിയറപ്രവര്‍ത്തകര്‍ അറിയിച്ചിരിക്കുന്നത്. 2020ല്‍ തിയേറ്ററുകളില്‍ എത്തേണ്ടിയിരുന്ന സിനിമയായിരുന്നു നോ ടൈം ടു ഡൈ

ജെയിംസ്​ ബോണ്ട്​ സിനിമകളുടെ ആരാധകർ ഏറെ പ്രതീക്ഷയോടെ കാത്തിരിക്കുന്ന ഏറ്റവും പുതിയ ചിത്രം 'നോ ടൈം ടു ഡൈ'യുടെ റിലീസ്​ വീണ്ടും മാറ്റിവെച്ചു. ഡാനിയൽ ക്രെയ്​ഗ്​ ബോണ്ടായി വേഷമിടുന്ന അവസാന ചിത്രമായ നോ ടൈം ടു ഡൈ കൊവിഡിന്‍റെ പശ്ചാത്തലത്തിലാണ് വീണ്ടും വൈകുന്നത്. സിനിമ ഒക്ടോബര്‍ എട്ടിന് റിലീസ് ചെയ്യുമെന്നാണ് ഇപ്പോള്‍ അണിയറപ്രവര്‍ത്തകര്‍ അറിയിച്ചിരിക്കുന്നത്. 2020ല്‍ തിയേറ്ററുകളില്‍ എത്തേണ്ടിയിരുന്ന സിനിമയായിരുന്നു നോ ടൈം ടു ഡൈ.

പതിവ്​ ജെയിംസ്​ ബോണ്ട്​ ചിത്രങ്ങളിൽ നിന്നും വ്യത്യസ്​തമായാണ്​ പുതിയ ചിത്രം ഒരുക്കിയിരിക്കുന്നത്​. ജമൈക്കയിൽ വിശ്രമ ജീവിതം നയിക്കുന്ന ബോണ്ടിന്​ പ്രത്യേക സാഹചര്യത്തിൽ വീണ്ടും അന്വേഷണത്തിന്​ ഇറങ്ങേണ്ടി വരുന്നതാണ്​ പ്രമേയം. ഓസ്​കർ ജേതാവായ റമി മാലികാണ്​ പ്രതിനായക വേഷത്തിലെത്തുന്നത്. അഞ്ചാം തവണയാണ്​ ഡാനിയൽ ക്രെയ്​ഗ്​ ജെയിംസ്​ ബോണ്ടായി വേഷമിടുന്നത്​. അവസാനം പുറത്തിറങ്ങിയത്​ സ്​പെക്​ട്ര എന്ന ചിത്രമായിരുന്നു. കാരി ജോജി ഫുക്ക്‌നാഗയാണ് നോ ടൈം ടു ഡൈയുടെ സംവിധായകന്‍.