Taylor Hawkins passes away: ഫൂ ഫൈറ്റേഴ്സ് മാന്ത്രിക നാദം ടെയ്‌ലര്‍ ഹോക്കിന്‍സ്‌ വിടവാങ്ങി. 50 വയസ്സായിരുന്നു. പ്രശസ്‌ത അമേരിക്കന്‍ മ്യൂസിക്‌ ബാന്‍ഡായ ഫൂ ഫൈറ്റേഴ്‌സിലെ ഡ്രമ്മറായിരുന്നു ട്രെയ്‌ലര്‍ ഹോക്കിന്‍സ്‌. ഫൂ ഫൈറ്റേഴ്സ് ബാന്‍ഡിന്‍റെ ട്വിറ്റര്‍ ഹാന്‍ഡിലിലൂടെയാണ് ടെയ്‌ലറുടെ മരണവാര്‍ത്ത പുറം ലോകം അറിഞ്ഞത്‌.
Foo Fighters share Taylor Hawkins death news: 'നമ്മുടെ പ്രിയപ്പെട്ട ടെയ്‌ലര്‍ ഹോക്കിന്‍സിന്‍റെ ദാരുണവും അകാലവുമായ നഷ്‌ടത്തില്‍ ഫൂ ഫൈറ്റേഴ്സ് കുടുംബം വളരെയധികം ദു:ഖിതരായിരിക്കുന്നു. അദ്ദേഹത്തിന്‍റെ സംഗീത ചൈതന്യവും നിറഞ്ഞ ചിരിയും നമ്മുടെ ഉള്ളില്‍ മായാതെ കിടക്കും.' -ബാന്‍ഡിന്‍റെ ഒദ്യോഗിക ഇന്‍സ്‌റ്റഗ്രാം പേജില്‍ കുറിച്ചു. 'ഞങ്ങള്‍ അദ്ദേഹത്തിന്‍റെ ഭാര്യക്കും കുട്ടികൾക്കും കുടുംബത്തിനും ഒപ്പമുണ്ട്‌. സങ്കൽപ്പിക്കാനാവാത്ത ഈ പ്രയാസകരമായ സമയത്ത് ടെയ്‌ലറുടെ കുടുംബത്തിന്‍റെ സ്വകാര്യതയെ അങ്ങേയറ്റം ബഹുമാനത്തോടെ പരിഗണിക്കണമെന്ന്‌ ഞങ്ങള്‍ അഭ്യര്‍ഥിക്കുന്നു.' -ബാന്‍ഡിന്‍റെ പ്രതിനിധി സ്‌റ്റീവ്‌ മാര്‍ട്ടിന്‍ ഒരു വിദേശ മാധ്യമത്തോട്‌ പ്രതികരിച്ചു.
അതേസമയം ടെയ്‌ലറുടെ മരണ കാരണം വ്യക്തമല്ല. ടെയ്‌ലര്‍ ഹോക്കിന്‍സിന്‍റെ മരണസമയത്ത്‌ ബാന്‍ഡ്‌ തെക്കേ അമേരിക്കയില്‍ പര്യടനത്തിലായിരുന്നു. ടെയ്‌ലര്‍ ഹോക്കിന്‍സിന്‍റെ അപ്രതീക്ഷിത വിയോഗത്തിന്‍റെ ഞെട്ടലിലാണ് ഹോളിവുഡ്‌ ലോകം. നിരവധി പേര് ടെയ്‌ലറിന് അനുശോചനം രേഖപ്പെടുത്തി രംഗത്തെത്തിയിട്ടുണ്ട്‌.