ആദ്യമായി മലയാളത്തിന്‍റെ കുഞ്ഞിക്ക ദുല്‍ഖര്‍ സല്‍മാന്‍ സംവിധായകന്‍ റോഷന്‍ ആന്‍ഡ്രൂസിനൊപ്പം ഒരു സിനിമക്കായി ഒരുമിക്കുകയാണ്. പൊലീസ് ഓഫീസറുടെ വേഷത്തിലാണ് ദുല്‍ഖര്‍ സിനിമയില്‍ എത്തുന്നത്. കഥപാത്രത്തിനായി ഹെയര്‍സ്റ്റൈലില്‍ അടക്കം താരം മാറ്റം വരുത്തിയിട്ടുണ്ട്. പേര് വെളിപ്പെടുത്തിയിട്ടില്ലാത്ത ചിത്രത്തിന്‍റെ ഷൂട്ടിങ് തിരുവനന്തപുരത്ത് പുരോഗമിക്കുകയാണ്. പുത്തന്‍ ലുക്കിലുള്ള ദുല്‍ഖറിന്‍റെ ഫോട്ടോകളാണ് ഇപ്പോള്‍ സോഷ്യല്‍മീഡിയകള്‍ കീഴടക്കുന്നത്. നീളന്‍ കൃതാവും കട്ടി മീശയും പൊലീസ് സ്റ്റൈല്‍ ഹെയര്‍കട്ടുമായാണ് താരം ഫോട്ടോയില്‍ പ്രത്യക്ഷപ്പെട്ടിരിക്കുന്നത്. വെള്ള ടീഷര്‍ട്ടാണ് ധരിച്ചിരുന്നത്. ഒപ്പം ഒരു കറുത്ത തൊപ്പി കൂടി അണിഞ്ഞ് ഒരു റാപ്പ് ബോയി സ്റ്റൈലിലാണ് താരം എത്തിയത്.
ബോളിവുഡ് താരം ഡയാന പെന്‍റിയാണ് റോഷന്‍ ആന്‍ഡ്രൂസ്-ദുല്‍ഖര്‍ സല്‍മാന്‍ ചിത്രത്തില്‍ നായിക. ചിത്രത്തിന് ബോബി-സഞ്ജയ് ടീം ആണ് തിരക്കഥ എഴുതിയിരിക്കുന്നത്. വേഫറെർ ഫിലിംസിന്‍റെ ബാനറിൽ നിർമിക്കുന്ന അഞ്ചാമത്തെ ചിത്രം കൂടിയാണിത്. മനോജ്.കെ.ജയൻ, അലൻസിയർ, ബിനു പപ്പു ,വിജയകുമാർ , ലക്ഷ്മി ഗോപാലസ്വാമി തുടങ്ങിയവർ മറ്റ് പ്രധാന വേഷങ്ങളിൽ എത്തുന്നു. തെന്നിന്ത്യയിലെ പ്രശസ്ത സംഗീതജ്ഞൻ സന്തോഷ് നാരായണനാണ് ചിത്രത്തിന് വേണ്ടി സംഗീതമൊരുക്കുന്നത്. ഛായാഗ്രഹണം അസ്‍ലം പുരയിൽ, മേക്കപ്പ് സജി കൊരട്ടി, വസ്ത്രാലങ്കാരം സുജിത് സുധാകരൻ, ആർട്ട് സിറിൽ കുരുവിള. കുറുപ്പ് സിനിമക്കായി ഏറെ നാളുകളായി മുടി നീട്ടി വളര്‍ത്തുകയായിരുന്നു ദുല്‍ഖര്‍ സല്‍മാന്‍.