മിഷൻ ഇംപോസിബിൾ ഏഴാം ഭാഗത്തിനായി ലോകമെമ്പാടുമുള്ള ഹോളിവുഡ് പ്രേക്ഷകർ കാത്തിരിക്കുകയാണ്. ടോം ക്രൂസിന്‍റെ എഥാൻ ഹണ്ടിന്‍റെ വരവിനായി ഇന്ത്യയിലെ ആരാധകരും ആകാംക്ഷയിലാണ്. ഒപ്പം പ്രഭാസും ചിത്രത്തിൽ ഭാഗമാകുമെന്ന് പ്രചാരണമുണ്ടായിരുന്നു.
എന്നാൽ, വാർത്തകൾ തെറ്റാണെന്ന് മിഷൻ ഇംപോസിബിൾ 7 സംവിധായകൻ ക്രിസ്റ്റഫര്‍ മക് ക്വാറി തന്നെ വ്യക്തമാക്കി. ലോകേഷ് വല്ലപുറെഡ്ഡി എന്ന ആരാധകന്‍റെ ട്വിറ്ററിലൂടെയുള്ള ചോദ്യത്തിന് മറുപടി നൽകുകയായിരുന്നു അദ്ദേഹം. മിഷന്‍ ഇംപോസിബിള്‍ 7ല്‍ പ്രഭാസ് ഒരു നിർണായക കഥാപാത്രത്തെ അവതരിപ്പിക്കുന്നുവെന്ന് ഇന്ത്യയിലെ വാർത്താ മാധ്യമങ്ങൾ റിപ്പോർട്ട് ചെയ്‌തെന്നും ഇത് ശരിയാണോ എന്നുമായിരുന്നു ചോദ്യം. ഇതിന് മറുപടിയായി വളരെ രസകരമായ മറുപടിയാണ് ക്രിസ്റ്റഫര്‍ മക് ക്വാറി പറഞ്ഞതും. "അദ്ദേഹം വലിയ പ്രതിഭാശാലിയാണ്, പക്ഷേ ഞങ്ങള്‍ ഇതുവരെയും കണ്ടിട്ടില്ല. ഇന്‍റര്‍നെറ്റിലേക്ക് സ്വാഗതം", എന്നാണ് മക് ക്വാറി കുറിച്ചത്.