പ്രണവിന്‍റെ 'ഹൃദയ'ത്തിന് ആശംസകള്‍ നേര്‍ന്ന് ചിരഞ്ജീവി

'ഹൃദയ'ത്തിന്‍റെ ഫസ്റ്റ്ലുക്ക് പോസ്റ്റര്‍ സോഷ്യല്‍മീഡിയയില്‍ വൈറലായിരുന്നു. വിനീത് ശ്രീനിവാസനാണ് ചിത്രം സംവിധാനം ചെയ്യുന്നത്.

നടന്‍ പ്രണവ് മോഹന്‍ലാല്‍ നായകനാകുന്ന ചിത്രം 'ഹൃദയ'ത്തിന്‍റെ ഫസ്റ്റ്‌ലുക്ക് കഴിഞ്ഞ ദിവസമാണ് സോഷ്യല്‍മീഡിയ വഴി റിലീസ് ചെയ്‌തത്. മലയാളത്തിലെ നിരവധി താരങ്ങള്‍ ഫസ്റ്റ്ലുക്ക് പങ്കുവച്ചിരുന്നു. ഇപ്പോള്‍ സിനിമയ്‌ക്ക് ആശംസകള്‍ നേരുകയാണ് തെലുങ്ക് സൂപ്പര്‍സ്റ്റാറുകളിലൊരാളായ ചിരഞ്ജീവി. 'പ്രിയ സുഹൃത്ത് മോഹന്‍ലാലിന്‍റെ മകന്‍ പ്രണവിനും ഹൃദയം ടീമിനും എല്ലാ ആശംസകളും' എന്നാണ് ചിരഞ്ജീവി പോസ്റ്റര്‍ പങ്കുവെച്ച് കുറിച്ചത്. കല്യാണി പ്രിയദര്‍ശനാണ് നായിക. നടനും ഗായകനും സംഗീത സംവിധായകനും തിരക്കഥാകൃത്തുമെല്ലാമായ വിനീത് ശ്രീനിവാസനാണ് സംവിധായകന്‍. നാല് വര്‍ഷത്തെ ഇടവേളയ്‌ക്ക് ശേഷം വിനീത് സംവിധാനം ചെയ്യുന്ന സിനിമയെന്ന പ്രത്യേകതയും ചിത്രത്തിനുണ്ട്. ജേക്കബിന്‍റെ സ്വര്‍ഗരാജ്യമാണ് വിനീത് സംവിധാനം ചെയ്‌ത് അവസാനമായി തിയേറ്ററുകളിലെത്തിയ സിനിമ.

ത്രികോണ പ്രണയകഥയാണ് 'ഹൃദയം' പറയുന്നതെന്നാണ് ഫസ്റ്റ്‌ലുക്കില്‍ നിന്നും മനസിലാകുന്നത്. പ്രണവിനും കല്യാണിക്കും പുറമെ ദര്‍ശന രാജേന്ദ്രനും ചിത്രത്തില്‍ സുപ്രധാന വേഷത്തിലെത്തുന്നുണ്ട്. ഒരുപാട് കാരണങ്ങൾ കൊണ്ട് തന്‍റെ ഹൃദയത്തോട് ചേർന്ന് നിൽക്കുന്ന സിനിമയാണ് 'ഹൃദയ'മെന്നാണ് വിനീത് ശ്രീനിവാസന്‍ പറയുന്നത്. പ്രണവും കല്യാണിയും ഒരുമിച്ച് അഭിനയിക്കുന്ന രണ്ടാമത്തെ സിനിമയുമാണ് ഹൃദയം.

മരക്കാര്‍ അറബിക്കടലിന്‍റെ സിംഹമാണ് ആദ്യമായി പ്രണവ്-കല്യാണി ജോഡി ഒരുമിച്ച് അഭിനയിച്ച സിനിമ. കല്യാണിയുടെ മൂന്നാമത്തെ മലയാള ചിത്രവും പ്രണവ് നായകനാകുന്ന മൂന്നാമത്തെ ചിത്രവുമാണിത്. നാൽപത് വർഷങ്ങൾക്ക് ശേഷം മെരിലാൻഡ് സിനിമാസ് തിരിച്ചെത്തുന്നുവെന്നതും ഹൃദയത്തിന്‍റെ പ്രത്യേകതയാണ്. മെരിലാൻഡിന് വേണ്ടി വൈശാഖ് സുബ്രഹ്മണ്യനാണ് സിനിമ നിർമിക്കുന്നത്. അജു വര്‍ഗീസ്, വിജയരാഘവന്‍, അരുണ്‍ കുര്യന്‍, ബൈജു എന്നിവരാണ് ചിത്രത്തിലെ മറ്റ് താരങ്ങള്‍.