എറണാകുളം: അർജുൻ അശോകൻ, സംയുക്ത മേനോൻ എന്നിവർ കേന്ദ്രകഥാപാത്രങ്ങളായി എത്തുന്ന 'വൂൾഫ്' ടൈറ്റിൽ പോസ്റ്റർ പുറത്തിറങ്ങി. നടൻ ഫഹദ് ഫാസിലാണ് സിനിമയുടെ ടൈറ്റിൽ പോസ്റ്റർ ഫേസ്‌ബുക്ക് പേജിലൂടെ പുറത്തുവിട്ടത്. ഷാജി അസീസ് സംവിധാനം ചെയ്യുന്ന ചിത്രത്തിൽ യുവതാരം ഷൈൻ ടോം ചാക്കോ, ഇർഷാദ്, ജാഫർ ഇടുക്കി എന്നിവരും മുഖ്യ കഥാപാത്രങ്ങളെ അവതരിപ്പിക്കുന്നുണ്ട്.
Unveiling the Title Poster of Wolf , Best Wishes to Arjun Ashokan , Samyuktha Menon & the entire team
Posted by Fahadh Faasil on Monday, 23 November 2020
ജി. ആർ ഇന്ദുഗോപനാണ് ചിത്രത്തിന്‍റെ രചന നിർവഹിക്കുന്നത്. റെഡ് തീമിൽ ഒരുങ്ങുന്ന വൂൾഫ്, ഷാജി അസീസിന്‍റെ മൂന്നാമത്തെ ചിത്രം കൂടിയാണ്. ഇതിന് മുമ്പ്, ഷേക്സ്പിയർ എംഎ മലയാളം, ഒരിടത്തൊരു പോസ്റ്റ്മാൻ ചിത്രങ്ങളിൽ ഷാജി അസീസ് സംവിധായകനായി പ്രവർത്തിച്ചിരുന്നു. ജനപ്രിയ- ആക്ഷേപഹാസ്യ ടെലിവിഷൻ പരമ്പര എം80 മൂസയുടെയും സംവിധായകനായിരുന്നു.
ദാമർ സിനിമയുടെ ബാനറിൽ സന്തോഷ് ദാമോദരനാണ് ചിത്രം നിർമിക്കുന്നത്. കഴിഞ്ഞ ഒക്ടോബർ 19നായിരുന്നു സിനിമയുടെ ചിത്രീകരണം ആരംഭിച്ചത്. പൂർണമായും കോവിഡ് മാനദണ്ഡങ്ങൾ പാലിച്ചായിരുന്നു വൂൾഫിന്‍റെ ചിത്രീകരണം.
