സിനിമാ പശ്ചാത്തലത്തില്‍ നിന്ന് വന്നവരല്ലെങ്കിലും മലയാള സിനിമാ മേഖലയില്‍ വലിയ മുന്നേറ്റം ഉണ്ടാക്കിയ നിരവധി താരങ്ങളുണ്ട്. അക്കൂട്ടത്തില്‍ ഒരാളാണ് അജു വര്‍ഗീസ്. വിനീത് ശ്രീനിവാസന്‍ ചിത്രം മലര്‍വാടി ആര്‍ട്‌സ് ക്ലബിലൂടെ സിനിമയിലേക്കെത്തി മുന്‍നിരയിലേക്ക് ഉയര്‍ന്നുവന്ന നടനാണ് അജു വര്‍ഗീസ്. ഒരു കൂട്ടം ചെറുപ്പക്കാരുടെ കഥപറഞ്ഞ മലര്‍വാടി ആര്‍ട്‌സ് ക്ലബിലെ കുട്ടു എന്ന കഥാപാത്രം അജു വര്‍ഗീസിന് നിരവധി ആരാധകരെ നേടികൊടുക്കുകയും കൂടുതല്‍ മികച്ച കഥാപാത്രങ്ങളിലേക്കുള്ള താരത്തിന്‍റെ വഴിത്തിരിവാകുകയും ചെയ്തു. ഏതുതരം കഥാപാത്രത്തെയും അനായാസം അവതരിപ്പിക്കുന്ന അജു വര്‍ഗീസ് സിനിമയിലെത്തി ഒമ്പത് വര്‍ഷങ്ങള്‍ പൂര്‍ത്തിയാക്കുമ്പോള്‍ നൂറോളം സിനിമകളില്‍ അഭിനയിച്ചിരിക്കുകയാണ്. നൂറാമത്തെ സിനിമയാണ് കഴിഞ്ഞ ദിവസം തീയറ്ററുകളിലേക്ക് എത്തിയ സച്ചിന്‍.
മലയാള സിനിമയിലെ യുവതലമുറയില്‍ ഹാസ്യകഥാപാത്രങ്ങള്‍ അനായാസം കൈകാര്യം ചെയ്യുന്നവരുടെ ലിസ്റ്റില്‍ ഒന്നാം സ്ഥാനത്താണ് അജു വര്‍ഗീസ്. അരങ്ങേറ്റ ചിത്രം തന്നെ ഹിറ്റായതോടെ കൈനിറയെ അവസരങ്ങളായിരുന്നു അജുവിനെ തേടി എത്തിയത്. സഹതാരമായും കോമേഡിയനായും നിരവധി വേഷങ്ങള്‍ അവതരിപ്പിക്കാന്‍ അജുവിന് കഴിഞ്ഞു. 2010 ല്‍ നിന്നും 2019 എത്തി നില്‍ക്കുമ്പോള്‍ അഭിനേതാവില്‍ നിന്നും നിര്‍മാതാവിന്‍റെ റോളിലേക്കും അജു മാറികഴിഞ്ഞു. തന്‍റെ നൂറാമത്തെ സിനിമ റിലീസിന് എത്തുന്നതിന്‍റെ സന്തോഷം ഫേസ്ബുക്കിലൂടെ അജു പങ്കുവച്ചിരുന്നു.