മറക്കാനാവാത്ത ഒരു സായാഹ്നം; സിദ്ദിഖിന്‍റെ വീട്ടിലെ സൽക്കാര വിരുന്ന് ചിത്രം ഏറ്റെടുത്ത് ആരാധകർ

മമ്മൂക്കയുടെ സെൽഫിക്ക് മോഹൻലാൽ, ജയറാം, ദിലീപ്, ഉണ്ണി മുകുന്ദൻ, ജയസൂര്യ, കുഞ്ചാക്കോ ബോബൻ എന്നിവർ പോസ് ചെയ്യുന്ന ചിത്രമാണ് വൈറലാകുന്നത്.

സഹതാരങ്ങൾക്കൊപ്പമുള്ള മനോഹരമായ സായാഹ്നം. മലയാളത്തിന്‍റെ താരരാജാക്കന്മാരും യുവതാരങ്ങളും ഒരുമിച്ചുള്ള സെല്‍ഫി നടന്‍ സിദ്ദിഖ് ഫേസ്ബുക്കിൽ പങ്കുവച്ചതോടെ ആരാധകരും ചിത്രം ഏറ്റെടുത്തുകഴിഞ്ഞു. മമ്മൂക്കയുടെ സെൽഫിക്ക് മോഹൻലാൽ, ജയറാം, ദിലീപ്, ഉണ്ണി മുകുന്ദൻ, ജയസൂര്യ, കുഞ്ചാക്കോ ബോബൻ എന്നിവർ പോസ് ചെയ്യുന്നതാണ് ചിത്രം.

"ഇന്നലത്തെ ദിവസത്തിനു അങ്ങനെ പ്രത്യേകതകൾ ഒന്നും ഉണ്ടായിരുന്നില്ല, എങ്കിൽ പോലും എന്‍റെ ക്ഷണം സ്വീകരിച്ച് എന്‍റെ സഹപ്രവർത്തകരായ മമ്മൂക്ക, മോഹൻലാൽ, ജയറാം, ദിലീപ്, ഉണ്ണി മുകുന്ദൻ, ജയസൂര്യ, ചാക്കോച്ചൻ ഇവരെല്ലാവരും ഇന്നലെ എന്‍റെ വീട്ടിലെത്തി..ഞങ്ങൾക്കെല്ലാവർക്കും മറക്കാനാവാത്ത ഒരു സായാഹ്നമായിരുന്നു.. എല്ലാവരും വലിയ സന്തോഷത്തിലും വലിയ ആഹ്ളാദത്തിലുമായിരുന്നു, അങ്ങനെ ഞങ്ങളുടെ ജീവിതത്തിലെ മറക്കാനാവാത്ത ഒരു സായാഹ്നം സമ്മാനിച്ചുകൊണ്ട് രാത്രി ഒരുമണിയോടുകൂടെ ഞങ്ങൾ പിരിഞ്ഞു.വീണ്ടും ഇതുപോലെ ഒരു സ്ഥലത്ത് ഇനിയും കൂടണം.. ഇനിയും ഇതിൽ കൂടുതൽ കൂടുതൽ ആളുകളെ ക്ഷണിക്കണം, നമുക്കെല്ലാവർക്കും ഇതുപോലെ ഇടക്കിടക്ക് സൗഹാര്‍ദപരമായ കൂടിച്ചേരലുകൾ ഉണ്ടാവണം എന്ന തീരുമാനത്തിൽ ഞങ്ങൾ പിരിഞ്ഞു.." സിദ്ദിഖ് ചിത്രത്തിനൊപ്പം കുറിച്ചു.

സിദ്ദിഖിന്‍റെ ക്ഷണപ്രകാരം അദ്ദേഹത്തിന്‍റെ വീട്ടില്‍ നടന്ന ഒത്തുകൂടലിന്‍റെ സന്തോഷം ഉണ്ണി മുകുന്ദനും സമൂഹ മാധ്യമങ്ങളിൽ പോസ്റ്റ് ചെയ്‌തിരുന്നു. എന്നാൽ താരങ്ങളുടെ ഒത്തുകൂടലിൽ സുരേഷ് ഗോപി കൂടി ഉണ്ടായിരുന്നെങ്കിൽ ആഘോഷം പൂർണമാകുമായിരുന്നെന്ന കമന്‍റുകളാണ് പോസ്റ്റിന് ലഭിക്കുന്നത്.