കൗണ്ടര്‍ കിങ് രമേഷ് പിഷാരടി മറ്റുള്ളവരുടെ സോഷ്യല്‍മീഡിയ പോസ്റ്റുകള്‍ മാത്രമല്ല. സ്വന്തമായി ഇടുന്ന പോസ്റ്റുകള്‍ക്കും ചിരിപടര്‍ത്തുന്ന തലക്കെട്ടുകളും കമന്‍റുകളുമാണ് നല്‍കാറ്. ഇപ്പോള്‍ ഇളയ മകനൊപ്പം മരച്ചുവട്ടില്‍ ആകാശം നോക്കി ഇരിക്കുന്ന ഫോട്ടോയാണ് താരം സോഷ്യല്‍മീഡിയയില്‍ പങ്കുവച്ചത്. പതിവ് തെറ്റിക്കാതെ ഇത്തവണയും നര്‍മ്മം കലര്‍ത്തിയാണ് പിഷാരടിയുടെ ക്യാപ്ഷന്‍.
മുകൾ രാജവംശത്തിൽ പെട്ടവരാണെന്നു തോനുന്നു
Posted by Ramesh Pisharody on Friday, April 30, 2021
'മുകള്‍ രാജവംശത്തില്‍ പെട്ടവരാണെന്ന് തോന്നുന്നു' എന്നാണ് പിഷാരടി മകനുമായി ഇരിക്കുന്ന ചിത്രത്തിന് നല്‍കിയ ക്യാപ്ഷന്‍. പതിവുപോലെ പിഷാരടിയുടെ ക്യാപ്ഷന്‍ ആരാധകരും ഏറ്റെടുത്തുകഴിഞ്ഞു. 'ചോള രാജവംശത്തെ വല്ലോം കണ്ടാല്‍ കുഞ്ഞന്‌ ഇത്തിരി പോപ്പ്കോണ്‍ വാങ്ങിച്ച്‌ കൊടുത്തേരെ' എന്നാണ് ഒരു ആരാധകന്‍ കമന്‍റ് ചെയ്‌തത്.
അടുത്തിടെ താരം പങ്കുവെച്ച്, സോഷ്യല്‍മീഡിയയില്‍ ഏറെ വൈറലായ വീഡിയോയായിരുന്നു കോഴിക്കോടുകാരന്‍ നൈസലിന്‍റെ 'പെര്‍ഫെക്‌ട് ഓകെ' ഇംഗ്ലീഷ് സംഭാഷണം. വൈറലായ ഇംഗ്ലീഷ് സംഭാഷണം കുറിച്ചുകൊണ്ട് പിഷാരടി തന്റെ ചിത്രവും പങ്കുവച്ചിരുന്നു.
