സിനിമയിൽ സജീവമല്ലാത്തതിന്‍റെ കാരണം തുറന്നുപറഞ്ഞ് ബാലചന്ദ്രമേനോൻ

ഞാൻ അഭിനയം നിർത്തിയെന്ന് കരുതെന്നുവെങ്കിൽ ആ ധാരണ മാറ്റുക. മനസിന് ഇഷ്‌ടപ്പെട്ട കഥാപാത്രങ്ങളൊന്നും മുന്നിൽ വരാത്തതുകൊണ്ടാണ് പുതിയ സിനിമകളില്ലാത്തതെന്ന് ബാലചന്ദ്രമേനോൻ പറഞ്ഞു.

"ഞാൻ അഭിനയം നിർത്തി എന്നാരെങ്കിലും കരുതുന്നുവെങ്കിൽ ആ ധാരണ മാറ്റുക." തന്നെ അടുത്തിടെ സിനിമയിൽ കാണാത്തതിന് കാരണം വ്യക്തമാക്കുകയാണ് നടനും സംവിധായകനും തിരക്കഥാകൃത്തുമായ ബാലചന്ദ്രമേനോൻ. താന്‍ അഭിനയം നിര്‍ത്തി എന്നാരെങ്കിലും കരുന്നുണ്ടെങ്കില്‍ ആ ധാരണ മാറ്റണമെന്നും മനസിന് ഇഷ്‌ടപ്പെട്ട കഥാപാത്രങ്ങളൊന്നും മുന്നിൽ വരാത്തതുകൊണ്ടാണ് പുതിയ സിനിമകളില്ലാത്തതെന്നും അദ്ദേഹം ഫേസ്‌ബുക്കിൽ പറഞ്ഞു. താരം അഭിനയിച്ച 19 വർഷങ്ങൾക്ക് മുൻപ് പുറത്തിറങ്ങിയ കൃഷ്ണാ ഗോപാലകൃഷ്ണ ചിത്രത്തിലെ ഗോപാലകൃഷ്ണനെന്ന കഥാപാത്രത്തിന്‍റെ ചിത്രം പങ്കുവെച്ചുകൊണ്ട് ഇയാളെ ഓർമയുണ്ടോയെന്ന് കുറിച്ചുകൊണ്ടാണ് ബാലചന്ദ്രമേനോന്‍ പോസ്റ്റ് ആരംഭിക്കുന്നത്.

• ഈ ആളിനെ ഓർമ്മയുണ്ടോ? അഭിമാനപൂർവ്വം ഞാൻ ഇദ്ദേഹത്തെ നിങ്ങൾക്ക് പരിചയപ്പെടുത്തുന്നു . ഗോപാലകൃഷ്ണൻ അല്ലെങ്കിൽ ഗോപാൽകൃഷ്ണൻ...

  Posted by Balachandra Menon on Saturday, 16 January 2021

അഭിനയ സാധ്യതയുള്ള, എന്തേലും വ്യത്യസ്തമായി തോന്നുന്ന അല്ലെങ്കിൽ നമ്മെ മോഹിപ്പിക്കുന്ന കഥാപാത്രങ്ങളാണ് വേണ്ടത്. കഥ, തിരക്കഥ, സംഭാഷണം, സംവിധാനം പോലെ തന്നെ അഭിനയത്തിലും താൻ ഒറ്റക്കാണെന്നും തനിക്ക് വേണ്ടി പ്രവർത്തിക്കാൻ പിആര്‍ഒമാരില്ലാത്തതിനാൽ പരസ്യമായി ഫേസ്‌ബുക്കിലൂടെ സ്വന്തം നയം വ്യക്തമാക്കുകയാണെന്നും ബാലചന്ദ്രമേനോന്‍ പറഞ്ഞു.

"സിനിമയിൽ വളരെ കുറച്ചു മാത്രം 'ബലാത്സംഗത്തിന്' വിധേയനായ നടനാണ് ഞാൻ. അതുകൊണ്ടു തന്നെ പുതുമയുള്ള ഒരു അങ്കത്തിനു ബാല്യവുമുണ്ട്..." എന്നും നടൻ കുറിപ്പിനവസാനം കൂട്ടിച്ചേർക്കുന്നു.