'വൈല്‍ഡ് ഡോഗ്' ചിത്രീകരണം ഹിമാലയത്തില്‍ പുനരാരംഭിച്ചു - ആക്ഷന്‍ ചിത്രം വൈല്‍ഡ് ഡോഗ്
നാഗാര്‍ജുന അക്കിനേനി കേന്ദ്രകഥാപാത്രമാകുന്ന ആക്ഷന്‍ ചിത്രം വൈല്‍ഡ് ഡോഗ് അഷിഷോര്‍ സോളമനാണ് സംവിധാനം ചെയ്യുന്നത്. എന്‍ഐഎ ഏജന്‍റായാണ് ചിത്രത്തില്‍ നാഗാര്‍ജുന അഭിനയിക്കുന്നത്
തെലുങ്ക് സൂപ്പര്‍താരം നാഗാര്‍ജുന അക്കിനേനി കേന്ദ്രകഥാപാത്രമാകുന്ന ആക്ഷന്‍ ചിത്രം വൈല്‍ഡ് ഡോഗിന്‍റെ ചിത്രീകരണം ഹിമാലയത്തില്‍ പുനരാരംഭിച്ചു. സിനിമയുടെ ലൊക്കേഷന്‍ ചിത്രങ്ങള്‍ നാഗാര്‍ജുന ട്വിറ്ററില്‍ പങ്കുവെച്ചു. ഇരുപത് ദിവസത്തെ ചിത്രീകരണമാണ് ഹിമാലയത്തിലുള്ളത്. കഴിഞ്ഞ വര്‍ഷമാണ് ചിത്രത്തിന്‍റെ ഷൂട്ടിങ് ആരംഭിച്ചത്. അഷിഷോര്‍ സോളമനാണ് ചിത്രം സംവിധാനം ചെയ്യുന്നത്. നിരഞ്ജന്‍ റെഡ്ഡി, അവ്നേഷ് റെഡ്ഡി എന്നിവര്‍ ചേര്‍ന്ന് മാറ്റിനി എന്‍റര്‍ടെയ്‌ന്‍മെന്‍റിന്‍റെ ബാനറിലാണ് ചിത്രം നിര്‍മിക്കുന്നത്. സയാമി ഖേര്‍, അലി റെസ, മയാങ്ക് പരാക് എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ദിവസങ്ങള്‍ക്ക് മുമ്പ് ഹിമാലയത്തില്‍ നിന്നുള്ള ഒരു വീഡിയോയും നാഗാര്‍ജുന സോഷ്യല്‍മീഡിയയില്‍ പങ്കുവെച്ചിരുന്നു. ഒരു എന്‍ഐഎ ഏജന്‍റിന്‍റെ വേഷത്തിലാണ് നാഗാര്‍ജുന ചിത്രത്തില്‍ എത്തുന്നത്. അതുല്‍ കുല്‍ക്കര്‍ണി, ദിയ മിര്‍സ എന്നിവരും ചിത്രത്തില്‍ അഭിനയിക്കുന്നുണ്ട്. ഷാനെയ്ല്‍ ഡിയോവാണ് ഛായാഗ്രഹണം. അയാല്‍ മുഖര്‍ജിയുടെ ബ്രഹ്മാസ്ത്രയുടെ ചിത്രീകരണം വൈല്‍ഡ് ഡോഗിന് ശേഷം ആരംഭിക്കും. മള്‍ട്ടി സ്റ്റാര്‍ ചിത്രത്തില്‍ അമിതാഭ് ബച്ചന്‍, ആലിയ ഭട്ട്, രണ്‍ബീര്‍ കപൂര്‍, മൗനി റോയ് എന്നിവരാണ് പ്രധാന കഥാപാത്രങ്ങളാകുന്നത്.