ക്യാൻസർ ശസ്ത്രക്രിയയുടെ 'മനോഹരമായ പാടുകൾ' തുറന്ന് കാണിച്ച് താഹിറ കശ്യപ്

താഹിറയും ആയുഷ്മാനും അര്‍ബുദത്തിനെതിരെ ഒന്നിച്ച് പോരാടുകയായിരുന്നു. താഹിറയുടെ അവസാന കീമോതെറാപ്പിയുടെ ചിത്രങ്ങളും ആയുഷ്മാന്‍ പോസ്റ്റ് ചെയ്തിരുന്നു.

ലോക അര്‍ബുധ ദിനത്തില്‍ ജനങ്ങള്‍ക്ക് കാന്‍സര്‍ അവബോധം പകര്‍ന്ന് ആയുഷ്മാന്‍ ഖുരാനയുടെ ഭാര്യ താഹിറ കശ്യപ്. ‘ഇന്ന് എന്‍റെ ദിവസമാണ്’ എന്ന് പറഞ്ഞാണ് ഇന്‍സ്റ്റഗ്രാമില്‍ താഹിറയുടെ കുറിപ്പ് ആരംഭിക്കുന്നത്. സ്തനാര്‍ബുദത്തിന് ശേഷം ശസ്ത്രക്രിയ നടത്തിയ പാടിന്‍റെ ഫോട്ടോ കൂടി ഉള്‍പ്പെടുത്തിയാണ് താഹിറയുടെ പോസ്റ്റ്.‘എല്ലാവര്‍ക്കും സന്തോഷം നിറഞ്ഞ ക്യാന്‍സര്‍ ദിനം നേരുന്നു. നമ്മള്‍ ഓരോരുത്തരും ഈ ദിവസത്തെ പോസിറ്റീവ് ആയാണ് ആഘോഷിക്കേണ്ടത്. എനിക്ക് കിട്ടിയ ആദരവിന്‍റെ അടയാളമായാണ് ശരീരത്തിലെ ഓരോ പാടുകളേയും ഞാന്‍ കാണുന്നത്,’ താഹിറ കുറിച്ചു.

‘നിങ്ങളെ തന്നെ സ്വീകരിക്കുന്നതിലൂടെയാണ് സന്തോഷം ഉണ്ടാവുന്നത്. ഈ ചിത്രത്തിലൂടെ എനിക്ക് ആഘോഷിക്കേണ്ടത് രോഗത്തെയല്ല, പക്ഷെ അതിനെ സഹിക്കാന്‍ ഞാന്‍ ആര്‍ജ്ജിച്ച സഹനശക്തിയെയാണ്,’ താഹിറ പറഞ്ഞു. ഭര്‍ത്താവ് ആയുഷ്മാന്‍ ഖുരാനയും ചിത്രത്തിന് താഴെ കമന്‍റുമായി എത്തി. ‘നിന്‍റെ പാടുകള്‍ മനോഹരമാണ്. അര്‍ബുദം ഉണ്ടെന്ന് അറിയുമ്പോള്‍ തളര്‍ന്ന് പോകുന്ന ലക്ഷക്കണക്കിന് പേരെ നീ പ്രചോദിപ്പിക്കുന്നു,’ ഖുരാന കമന്‍റ് ചെയ്തു.

താഹിറ-ആയുഷ്മാൻ

ചികിത്സ സംബന്ധിച്ച എല്ലാ വിവരങ്ങളും പ്രചോദനമാകുന്ന ഒട്ടേറെ പോസ്റ്റുകളും തന്‍റെ ചിത്രങ്ങളും താഹിറ സമൂഹ മാധ്യങ്ങളിലൂടെ പങ്കുവയ്ക്കാറുണ്ട്. മുടി മുഴുവന്‍ പോയി മൊട്ടയായിട്ടുളള താഹിറയുടെ ചിത്രം ഈയടുത്ത് വൈറലായി മാറിയിരുന്നു.