മധുരരാജയിലെ തന്‍റെ ഐറ്റം ഡാൻസ് ഏറ്റെടുത്ത ആരാധകര്‍ക്കും ചിത്രത്തിലെ നായകൻ മമ്മൂട്ടിക്കും നന്ദി പറഞ്ഞ് ബോളിവുഡ് താരം സണ്ണി ലിയോണ്‍.
മമ്മൂട്ടിക്കൊപ്പം അഭിനയിക്കുന്നതിനെ കുറിച്ച് അല്‍പ്പം ടെന്‍ഷനിലായിരുന്നു സണ്ണി എന്ന് ചിത്രത്തിന്‍റെ സംവിധായകന്‍ വൈശാഖ് മുന്‍പൊരു അഭിമുഖത്തില്‍ പറഞ്ഞിരുന്നു. “ മമ്മൂട്ടി വളരെ ഗൗരവക്കാരനായ ഒരു നടനാണെന്നും സഹപ്രവര്‍ത്തകരോട് അത്ര സ്നേഹത്തോടെ ഇടപഴകാത്ത ആളാണെന്നുമൊക്കെയാണ് സണ്ണി കേട്ടത്. അത് കൊണ്ടു തന്നെ മധുരരാജയുടെ വേഷത്തില്‍ മമ്മൂക്കയെ കണ്ടപ്പോള്‍ അവര്‍ അക്ഷരാര്‍ത്ഥത്തില്‍ ഭയന്നു. പക്ഷെ പിന്നീട് വളരെ പെട്ടെന്ന് തന്നെ അവര്‍ എല്ലാവരുമായി അടുത്തു,” വൈശാഖ് പറഞ്ഞു.
മമ്മൂട്ടിയുടെ സമീപകാലത്തെ ഏറ്റവും വിലയ വിജയ ചിത്രമായിരിക്കുകയാണ് ‘മധുരരാജ’. ആദ്യ ഭാഗം ‘പോക്കിരിരാജ’യെക്കാള്‍ മാസ്സും ആക്ഷനുമാണ് ‘മധുരരാജ’ എന്നാണ് ആരാധകരുടെ പക്ഷം. ചിത്രത്തിന് മൂന്നാം ഭാഗം ‘മിനിസ്റ്റര്‍ രാജ’ വരുന്നു എന്ന സൂചനകളും സംവിധായകന്‍ നല്‍കിയിരുന്നു.