കൊവിഡ് വ്യാപന സാഹചര്യവും അത് നിയന്ത്രിക്കാൻ ഏര്‍പ്പെടുത്തിയ ലോക്ക്ഡൗണും കണക്കിലെടുത്ത് സംസ്ഥാനത്ത് ആഴ്ചകളായി അടച്ചിട്ടിരുന്ന മദ്യവിൽപ്പനശാലകള്‍ കഴിഞ്ഞ ദിവസമാണ് തുറന്നത്. ടെസ്റ്റ് പോസിറ്റിവിറ്റി നിരക്ക് 20 ശതമാനത്തിൽ താഴെയുള്ള തദ്ദേശ സ്ഥാപന പരിധിയിൽ പ്രവര്‍ത്തിക്കുന്ന ബെവ്റേജസ് ഔട്ട്ലറ്റുകളും ബാറുകളുമാണ് തുറന്നത്.
മദ്യവില്‍പ്പന ശാലകള്‍ ഒമ്പത് മണിക്കാണ് പ്രവര്‍ത്തനം ആരംഭിക്കുന്നതെങ്കിലും ആളുകള്‍ മണിക്കൂറുകള്‍ക്ക് മുമ്പേ എത്തി കാത്തുനില്‍പ്പ് ആരംഭിക്കും. എല്ലാ മദ്യ വില്‍പ്പന ശാലകള്‍ക്ക് മുമ്പിലും വലിയ തിരക്കാണ്.
കൊവിഡ് രണ്ടാം തരംഗം ശക്തമായി തന്നെ തുടരുമ്പോഴും ഇത്തരം സാഹചര്യങ്ങള്‍ വീണ്ടും അപകടം വിളിച്ച് വരുത്തുമെന്നാണ് സംവിധായകന്‍ പ്രിയദര്‍ശന്‍ പ്രതിഷേധം പ്രകടിപ്പിച്ച് സോഷ്യല്‍മീഡിയയില്‍ കുറിച്ചത്.