ജയറാം നായകനാകുന്ന പുതിയ ചിത്രം പട്ടാഭിരാമന്‍റെ പൂജ കൊച്ചിയിൽ നടന്നു

പഞ്ചവർണ്ണ തത്ത, മാർക്കോണി മത്തായി എന്നീ ചിത്രങ്ങളിലെ കഥാപാത്രങ്ങളെ പോലെ ശ്രദ്ധയാകർഷിക്കുന്ന കേന്ദ്ര കഥാപാത്രമാണ് പട്ടാഭിരാമനിലും ജയറാം അവതരിപ്പിക്കുന്നത്.

ജയറാമിനെ നായകനാക്കി കണ്ണൻ താമരക്കുളം സംവിധാനം ചെയ്യുന്ന പുതിയ ചിത്രമാണ് പട്ടാഭിരാമൻ. ചിത്രത്തിന്‍റെ പൂജ നടൻ ജനാർദ്ദനൻ കൊച്ചിയിൽ നിർവഹിച്ചു.

സംവിധായകൻ കണ്ണൻ താമരക്കുളവും നടൻ ജയറാമും ഒന്നിക്കുന്ന നാലാമത്തെ ചിത്രമാണ് പട്ടാഭിരാമൻ. ദിനേഷ് പള്ളത്താണ് ചിത്രത്തിന് തിരക്കഥ ഒരുക്കുന്നത്. അബാം മൂവീസിന്‍റെ ബാനറിൽ എബ്രഹാം മാത്യു നിർമ്മിക്കുന്ന ചിത്രത്തിൽ മിയ ജോർജും, ഷീലു എബ്രഹാമുമാണ് നായികമാർ. ഹരീഷ് കണാരൻ, രമേഷ് പിഷാരടി , ധർമ്മജൻ ബോൾഗാട്ടി, സായി കുമാർ തുടങ്ങിയ മുൻനിര താരങ്ങളും ചിത്രത്തിൽ അണിനിരക്കുന്നുണ്ട്.

ഇന്ത്യയിലെ മുഴുവനാളുകളും ആഗ്രഹിക്കുന്ന ഒരു കാര്യം ചെയ്യുവാൻ വേണ്ടി പ്രാപ്തനായ ഒരു വ്യക്തിയെ സർക്കാർ നിയമിക്കുന്നതും അദ്ദേഹത്തിന്‍റെ ഒറ്റയാൾ പോരാട്ടവുമാണ് പട്ടാഭിരാമനിലൂടെ അവതരിപ്പിക്കുന്നതെന്ന് ജയറാം പറഞ്ഞു. സിനിമയുടെ ചിത്രീകരണം അടുത്ത ആഴ്ച തിരുവനന്തപുരത്ത് ആരംഭിക്കും.