Jagathy to act CBI 5 : സിബിഐ അഞ്ചാം ഭാഗത്തിനായുള്ള കാത്തിരിപ്പിലാണ് നാളേറെയായി ആരാധകര്‍. സേതുരാമയ്യര്‍ സിബിഐ ആയി മമ്മൂട്ടി എത്തുമ്പോള്‍ താരത്തിന്‍റെ അസിസ്‌റ്റന്‍റായി വിക്രം എന്ന കഥാപാത്രത്തെ അവതരിപ്പിച്ച ജഗതി ശ്രീകുമാര്‍ പുതിയ സീരീസില്‍ മമ്മൂട്ടിക്കൊപ്പം എത്തുമോ എന്നായിരുന്നു ചിത്ര പ്രഖ്യാപനം മുതല്‍ ആരാധകരുടെ ചോദ്യം.
2012ലുണ്ടായ വാഹനാപകടത്തില്‍ പരിക്കേറ്റ താരം ആരോഗ്യ പ്രശ്‌നങ്ങളെ തുടര്‍ന്ന് ഒൻപത് വര്‍ഷമായി അഭിനയ ജീവിതത്തില്‍ നിന്നും വിട്ടു നില്‍ക്കുകയായിരുന്നു. അടുത്തിടെ ഒരു പരസ്യ ചിത്രത്തില്‍ അഭിനയിച്ചതോടെ താരം സിനിമ ജീവിതത്തിലേയ്‌ക്ക് മടങ്ങിവരുമോ എന്ന് ചിലരെങ്കിലും പ്രതീക്ഷിച്ചു. ഇപ്പോഴിതാ പ്രേക്ഷകര്‍ക്ക് സന്തോഷകരമാകുന്ന വാര്‍ത്തയാണ് പുറത്തുവരുന്നത്.
Jagathy as Vikram in CBI series : സിബിഐ അഞ്ചാം ഭാഗത്തില്‍ ജഗതിയും ഉണ്ടാകുമെന്നാണ് റിപ്പോര്‍ട്ടുകള്‍. ചിത്രത്തിന്‍റെ ആദ്യഘട്ട ചിത്രീകരണം കൊച്ചിയില്‍ ആരംഭിച്ചതിന് തൊട്ടുപിന്നാലെയാണ് പുതിയ പ്രഖ്യാപനവും. സിബിഐ സീരീസിലെ നാലു ചിത്രങ്ങളിലും ഏറെ കയ്യടി നേടിയ കഥാപാത്രം വിക്രമിന്‍റേതാണ്. അഞ്ചാം ഭാഗത്തിലൂടെയുള്ള ജഗതിയുടെ മടങ്ങിവരവ് ആരാധകര്‍ ആഘോഷമാക്കാന്‍ ഒരുങ്ങിയിരിക്കുകയാണ്.
CBI 5 shoot at Jagathy's home : പുതിയ സീരീസില്‍ ജഗതിയും വേണമെന്ന് സംവിധായകന്‍ കെ.മധു, മമ്മൂട്ടി എന്നിവര്‍ക്ക് നിര്‍ബന്ധമായിരുന്നു. ഇതേതുടര്‍ന്നായിരുന്നു തീരുമാനം. അതേസമയം ജഗതിയുടെ ആരോഗ്യസ്ഥിതി കണക്കിലെടുത്ത് തിരുവനന്തപുരത്തെ അദ്ദേഹത്തിന്‍റെ വീട്ടില്‍ തന്നെയാണ് ചിത്രീകരണം എന്നാണ് സൂചന.