മുംബൈ: 20ാമത് ഇന്‍റർനാഷണൽ ഇന്ത്യൻ ഫിലിം അക്കാദമി അവാർഡ് പുരസ്കാരങ്ങൾ സമർപ്പിച്ചു. മികച്ച നടിക്കുള്ള പുരസ്കാരം ആലിയ ഭട്ടും മികച്ച നടനുള്ള പുരസ്കാരം രൺവീർ സിങ്ങും സ്വന്തമാക്കി.പദ്മാവതിലെ അഭിനയമാണ് മികച്ച നടനുള്ള പുരസ്കാരം രൺവീറിന് നേടി കൊടുത്തത്. മികച്ച ചിത്രമായി തെരഞ്ഞെടുക്കപ്പെട്ട മേഘ്ന ഗുൽസാർ ചിത്രം ‘റാസി’യിലെ പ്രകടനമാണ് ആലിയക്ക് മികച്ച നടിക്കുള്ള പുരസ്കാരം നേടിക്കൊടുത്തത്. മികച്ച സംവിധായകനുള്ള പുരസ്കാരം ശ്രീറാം രാഘവൻ (അന്ധാധൂൻ) നേടി.
ബുധനാഴ്ച രാത്രി മുംബൈയിൽ നടന്ന അവാർഡ് ദാനചടങ്ങിന്‍റെ അവതാരകരായി എത്തിയത് നടൻ ആയുഷ്മാൻ ഖുറാനയും അപർശക്തി ഖുറാനയുമായിരുന്നു. സൽമാൻ ഖാൻ, കത്രീന കൈഫ്, വിക്കി കൗശൽ, സാറാ അലി ഖാൻ, മാധുരി ദീക്ഷിത് തുടങ്ങിയ താരങ്ങളുടെ ഗംഭീരപ്രകടനങ്ങൾക്കും പുരസ്കാരവേദി സാക്ഷിയായി. പ്രീതി സിന്‍റ, ഉർവശി റൂതെല, സ്വര ഭാസ്കർ, ജെനീലിയ ഡിസൂസ, റിതേഷ് ദേശ്‌മുഖ് എന്നിവരും പങ്കെടുത്തു. ഹിന്ദി സിനിമക്ക് നൽകിയ സമഗ്ര സംഭാവനകൾക്ക് സരോജ് ഖാനെയും പുരസ്കാരം നൽകി ആദരിച്ചു. സാധാരണയായി വിദേശ രാജ്യങ്ങളില്‍ വച്ച് നടക്കാറുള്ള ഐഫ പുരസ്കാര ചടങ്ങ് ഏറെ നാളുകൾക്ക് ശേഷമാണ് മുംബൈയില്‍ അരങ്ങേറിയത്.