നടി ദിയ മിർസ വിവാഹമോചിതയാകുന്നു

വേര്‍പിരിയാനൊരുങ്ങുന്നത് സഹില്‍ സംഘയുമൊത്തുള്ള അഞ്ചുവര്‍ഷത്തെ ദാമ്പത്യത്തിനൊടുവില്‍. കൂടുതല്‍ പ്രതികരണങ്ങൾക്കില്ലെന്നും ദിയ.

വിവാഹ ബന്ധം വേർപ്പെടുത്താനൊരുങ്ങി നടിയും മോഡലും മുൻ മിസ് ഇന്ത്യയുമായ ദിയ മിർസ. സമൂഹമാധ്യമങ്ങളിലൂടെയാണ് നടി ഇക്കാര്യം അറിയിച്ചത്. 2014ലാണ് ദിയ മിര്‍സയും സഹില്‍ സംഘയും വിവാഹിതരാകുന്നത്.

രണ്ടുപേരുടെയും തീരുമാനപ്രകാരമാണ് വിവാഹമോചനമെന്നും ഇനി സുഹൃത്തുക്കളായി തുടരുമെന്നും ദിയ പറഞ്ഞു . ജീവിതത്തില്‍ രണ്ട് വഴിയിലാവുകയാണെങ്കിലും പരസ്‍പരമുള്ള സ്‍നേഹവും ബഹുമാനവും എന്നും ഉണ്ടാകുമെന്നും ദിയ കൂട്ടിച്ചേര്‍ത്തു. 'കുടുംബത്തോടും സുഹൃത്തുക്കളോടും നന്ദിയുണ്ട്. മാധ്യമങ്ങളുടെ പിന്തുണ തുടര്‍ന്നും ഉണ്ടാകണം. ഞങ്ങളുടെ സ്വകാര്യതയെ മാനിക്കണം. ഇക്കാര്യത്തില്‍ ഇനി ഒരു പ്രതികരണം ഉണ്ടാകുന്നതല്ല'- ദിയ മിര്‍സ കുറിച്ചു.

നീണ്ട ആറ് വർഷത്തെ പ്രണയത്തിനൊടുവിലാണ് ദിയയും സഹിലും വിവാഹിതരായത്. രൺബീർ കപൂർ നായകനായെത്തിയ സഞ്ജുവിലാണ് ദിയ അവസാനമായി അഭിനയിച്ചത്. നിലവില്‍ കാഫിർ എന്ന വെബ് സീരീസിലാണ് നടി അഭിനയിക്കുന്നത്.