ഗൗതം മേനോന്‍റെ ട്വീറ്റിന് മറുപടി നല്‍കി കാർത്തിക് നരേന്‍

സാർ, ഇത് എന്‍റെ ഹൃദയത്തോട് ചേർന്നു നിൽക്കുന്ന സിനിമ, 'നരകാസുരൻ' എന്ന് വെളിച്ചം കാണും?: ഗൗതം മേനോന്‍റെ ട്വീറ്റിന് കാർത്തിക് നരേന്‍റെ മറുപടി

മലയാളി താരം റഹ്‌മാൻ പ്രധാന വേഷത്തിലെത്തിയ 'ധ്രുവങ്ങൾ പതിനാറി'ന്‍റെ സംവിധായകൻ കാർത്തിക് നരേനും 'വിണ്ണൈ താണ്ടി വരുവായ', 'വാരണമായിരം' തുടങ്ങിയ ഒരുപിടി റൊമാന്‍റിക് ഹിറ്റുകൾ സമ്മാനിച്ച സംവിധായകൻ ഗൗതം വസുദേവ മേനോനും തമ്മിലുള്ള വിവാദം നിലനിൽക്കെ തങ്ങളുടെ പുതിയ സിനിമയുടെ റിലീസിനെച്ചൊല്ലി വീണ്ടും പിരിമുറുക്കം. യുവസംവിധായകൻ കാർത്തിക് നരേന്‍റെ പുതിയ ചിത്രം 'നരകാസുരനെ'ച്ചൊല്ലിയാണ് തർക്കം. ഗൗതം മേനോന്‍റെ നിർമാണ കമ്പനിയായ ഒൻട്രാഡ എന്‍റർടൈൻമെന്‍റ്സാണ് ചിത്രത്തിന്‍റെ നിർമാണം ഏറ്റെടുത്തത്. പക്ഷേ, ചിത്രം പൂർത്തിയായിട്ടും റിലീസ് വൈകുകയാണ്.
ചിയാൻ വിക്രം നായകനാകുന്ന 'ധ്രുവനച്ചത്തിരം' അവസാനഘട്ട നിർമ്മാണത്തിലാണെന്നും ഈ വർഷം തന്നെ ചിത്രം റിലീസിനെത്തുമെന്നും സംവിധായകൻ ഗൗതം മേനോൻ ട്വീറ്റ് ചെയ്‌തിരുന്നു. ഇതിനു കാർത്തിക് നൽകിയ മറുപടിയാണ് പുതിയ വിവാദത്തിന് കാരണം. 'ദി ചിയാൻ വിക്ര'മുമായി സിനിമ ചെയ്യാൻ കഴിഞ്ഞതിൽ വളരെ സന്തോഷമുണ്ട്. ചിത്രം തന്‍റെ ഹൃദയത്തോടടുത്ത് നിൽക്കുന്നുവെന്ന് ജിവിഎം (ഗൗതം വസുദേവ മേനോൻ) ട്വിറ്ററിൽ കുറിച്ചു. സിനിമയുടെ പോസ്റ്റ് പ്രൊഡക്ഷൻ 60 ദിവസത്തിനുള്ളിൽ അവസാനിക്കുമെന്നും ധ്രുവനച്ചത്തിരം ഉടൻ റിലീസ് ചെയ്യുമെന്നും അദ്ദേഹം വ്യക്തമാക്കി.

എന്നാൽ, ജിവിഎമ്മിന്‍റെ ട്വീറ്റിന് കാർത്തിക് കമന്‍റ് ചെയ്‌തത് ഇങ്ങനെയാണ്, "നരകാസുരൻ എന്ന് വെളിച്ചം കാണുമെന്ന് ഒരു വ്യക്തത നൽകിയിരുന്നുവെങ്കിൽ വളരെ ഉപകാരമാണ് സാർ. അതെ ഈ സിനിമ എന്‍റെ ഹൃദയത്തോടും ചേർന്നു നിൽക്കുന്നതാണ്".ഗൗതം മേനോൻ നരകാസുരന്‍റെ നിർമ്മാണത്തിന് പണം നൽകുന്നില്ലെന്നും ഇത് തന്നെ വലിയ പ്രതിസന്ധിയിലാക്കിയിരിക്കുകയാണെന്നും കാർത്തിക് മുമ്പ് പറഞ്ഞിരുന്നു. ഇതിനുശേഷം ഇരുവരുടെയും സിനിമകളൊന്നും റിലീസ് ചെയ്‌തിട്ടുമില്ല. ഇനി വരാനിരിക്കുന്ന ഗൗതം മേനോൻ ചിത്രങ്ങൾ പ്രേക്ഷകർ ഏറെ കാത്തിരിക്കുന്ന എന്നൈ നോക്കി പായും തോട്ടൈയും ധ്രുവനച്ചത്തിരവുമാണ്. ഇതിൽ ധനുഷ് ചിത്രം എന്നൈ നോക്കി പായും തോട്ടൈ ഈ മാസം 15ന് തീയറ്ററുകളിലെത്തുമെന്ന് സംവിധായകൻ അറിയിച്ചിരുന്നു. അതേ സമയം, കാർത്തിക് നരേന്‍റെ നരകാസുരനാവട്ടെ പൂർത്തിയായി ഒരു വർഷം കഴിഞ്ഞിട്ടും സാമ്പത്തിക പ്രശ്നങ്ങൾ മൂലം വൈകുകയാണ്. ഇന്ദ്രജിത്ത് സുകുമാരൻ, അരവിന്ദ് സ്വാമി, ശ്രീയ ശരൺ എന്നിവർ പ്രധാന വേഷങ്ങളിലെത്തുന്ന നരകാസുരനിലും തമിഴകത്തിന് ഏറെ പ്രതീക്ഷയാണുള്ളത്.