മാമാങ്കത്തിനെയും പൗരത്വ ഭേദഗതി നിയമത്തെയും പിന്തുണച്ച് സംവിധായകൻ മേജര്‍ രവി

മാമാങ്കം സിനിമയെ നശിപ്പിക്കാനുള്ള നീക്കങ്ങൾ ശരിയല്ലെന്നും അതുപോലെ പൗരത്വ ഭേദഗതി നിയമത്തിൽ തെറ്റിദ്ധാരണ പരത്തുകയാണെന്നും മേജര്‍ രവി ഫേസ്ബുക്ക് ലൈവിലൂടെ പറഞ്ഞു.

മാമാങ്കം സിനിമയെ നശിപ്പിക്കാനുള്ള നീക്കങ്ങൾ ശരിയല്ലെന്നും അത്തരത്തിലുള്ള പ്രവൃത്തികൾ ചെയ്യരുതെന്നും സംവിധായകൻ മേജര്‍ രവി. ഒരു സിനിമയെന്നത് കുറേയാളുകളുടെ കഠിനപ്രയത്‌നമാണെന്നും ചിത്രം കാണാതെയുള്ള ആരോപണങ്ങൾ ഒഴിവാക്കണമെന്നും ഫേസ്ബുക്ക് ലൈവിലൂടെ അദ്ദേഹം വ്യക്തമാക്കി.

"താൻ സിനിമ കണ്ടു. നല്ല അഭിപ്രായമാണ് മാമാങ്കത്തെക്കുറിച്ച്‌. ശരിക്കും ആസ്വദിക്കാന്‍ കഴിയുന്ന ചിത്രം തന്നെയാണ് മാമാങ്കം. ചിത്രത്തിന്‍റെ തുടക്കത്തില്‍ ആശങ്കയുണ്ടായിരുന്നെങ്കിലും സിനിമ നല്ല അനുഭവമാണ് നൽകിയത്. മമ്മൂട്ടിയും ഉണ്ണി മുകുന്ദനുമൊക്കെ വളരെ മികച്ച പ്രകടനം ചിത്രത്തിൽ കാഴ്‌ച വച്ചു." സിനിമയെക്കുറിച്ചുള്ള തെറ്റായ പ്രചരണം ശരിയല്ലെന്നും സിനിമകളുടെ വ്യാജപതിപ്പ് ഇറക്കുന്ന പോലുള്ള പ്രവൃത്തികൾ ഉപേക്ഷിക്കണമെന്നും മേജര്‍ രവി കൂട്ടിച്ചേർത്തു. മാമാങ്കത്തിനെ പിന്തുണച്ചുള്ള ഫേസ്ബുക്ക് ലൈവ് ഷെയർ ചെയ്‌ത് കൊണ്ട് നടൻ ഉണ്ണി മുകുന്ദൻ അദ്ദേഹത്തിന് നന്ദി പറഞ്ഞു.

ലൈവിലൂടെ പൗരത്വ ഭേദഗതി നിയമത്തിലും സംവിധായകൻ അഭിപ്രായപ്രകടനം നടത്തി. പൗരത്വ ഭേദഗതി നിയമം ഇന്ത്യക്കാരെ ബാധിക്കില്ലെന്നും ഭേദഗതി പ്രാബല്യത്തിൽ വന്നതിനു ശേഷം തെറ്റിദ്ധാരണ പരത്തുകയാണ് ചെയ്യുന്നതെന്നും അദ്ദേഹം പറഞ്ഞു. ആളുകൾ തമ്മിലടിക്കുന്നതിനു പകരം എല്ലാവരും ഒരുമിച്ചു നിൽക്കണം. കാബ് വലിയൊരു പ്രശ്‌നമാക്കിയെടുക്കരുത്. ഇതിലേക്ക് രാഷ്‌ട്രീയ താൽപര്യങ്ങൾ വലിച്ചിഴച്ചുകൊണ്ടുള്ള നീക്കങ്ങളിൽ അകപ്പെടരുത്. ഇപ്പോൾ പാർട്ടിയും ജാഥയുമായി നടക്കുന്നവരെ പറഞ്ഞു മനസ്സിലാക്കേണ്ടത് യുവാക്കളാണ്. അനധികൃതമായി പ്രവേശിച്ചവർക്കെതിരെ മാത്രമെ ഈ നിയമം പ്രാവർത്തികമാകൂയെന്നും അദ്ദേഹം ലൈവ് വീഡിയോയിലൂടെ വ്യക്തമാക്കി.